江若琳炒車後首現身 坦承有陰影短期內唔再揸車

江若琳今個月中駕駛7人車於尖沙咀轉彎時，7人車因失控而翻車，現場熱心市民見狀即自發組織救援，幸好最後江若琳亦無大礙，事後呢個彎位更被網民封為「江若琳灣」。呢日江若琳喺車禍後首度公開現身，佢仲親自還原當日情況。

江若琳自炒車後首次出席公開活動。
江若琳指當日自己行車速度相當慢，當時因為搶軚，所以自己好想扭返正，但因為咁造成衝力而令架車翻車，佢指當時自己都唔太敢相信眼前見到嘅事物，仲指感覺猶如過山車般，而經過今次嘅經歷後，佢發現保住命仔係好重要，又指大難不死都算幸運。

江若琳月中喺尖沙咀炒車。
江若琳指如果以前嘅自己遇上呢件事，就一定會淚灑當場，但自從做咗媽媽後，佢就變得震定，又透露遇事當下嘅第一個反應就係要逃生。對於事後網民將該灣位戲稱為「江若琳灣」，佢就坦言覺得尷尬，仲話希望囝囝長大後呢個名會被大家遺忘呀。

因為有陰影，所以江若琳暫時唔會再揸車。
車禍發生後江若琳指自己仲未驚完，每晚瞓覺都會夢見當日炒車嘅電燈柱，行過見到該路段都會想避開，江若琳又指自己短期內都唔會揸車住，暫時由老公蕭唯展做住柴可夫先，佢又大讚老公超sweet，喺車禍後不停安撫佢嘅情緒。而為咗散心，佢早前就同老公囝囝去咗日本旅行，由於要忙住湊仔，江若琳話反而令佢暫時忘記炒車呢件事。