杜德偉上海開騷太太囝囝同行 計劃明年香港開騷賀出道40周年

杜德偉連續兩年年尾都喺上海開騷，太太Ice同囝囝AJ今次亦有同行，開場前佢地特登幫Alex打氣，又送擁抱又送吻，一家三口非常溫馨。ㄧ開騷Alex就送上首次公開表演嘅新歌《黑日》，Alex話首歌啱啱先上架，為咗今次演唱會仲特別排舞，希望上海嘅歌迷可以感受到佢嘅誠意。

杜德偉於上海開騷。
唱到慢歌環節，ALEX喺台上大方向太太同囝囝示愛，仲以一首《陪著我一輩子》表達對太太嘅謝意。而當唱到《情人》時，Alex帶領全場歌迷大合唱，溫馨嘅場面令ALEX非常感動，「全場大合唱，佢地比返個energy我，就係話佢地好喜歡囉！呢個台上台下融為一體嘅感覺，係演唱會裡面最感動嘅地方。」
杜德偉嘅太太同兒子都有嚟支持。
Alex上年喺上海開騷，招牌舞曲《脫掉》冇唱到，令唔少觀眾覺得有小小美中不足，今次Alex順應民意，送上熱力四射嘅《脫掉》，現場氣氛high爆。

完騷之後，ALEX同屋企人以及工作人員即刻喺後台開餐，而講到送舊迎新嘅新年願望，ALEX就話過去一年喺好多城市開騷，所以感覺好豐盛，而同時佢亦有好消息宣布：「2025年係我出道40周年，40周年係一個幾難得嘅機會，希望爭取呢個機會可以喺香港，我自己出道嘅地方開一個演唱會。」
杜德偉與團隊一齊過聖誕。