中年好聲音3｜將分七組對壘展開激烈團戰 大魔王黃博及天花板級劉洋分別領軍

《中年好聲音3》選手黃博憑住一首《我歌故我在》喺社交平台同視頻平台吸引超過二百萬點擊，唱功受網民關注之外，連大前輩甄妮都留言讚好，稍後節目將會展開團戰，分開7組對壘，最終最低分三組會有五位選手被淘汰。
大魔王黃博領軍出戰。
大灣區選手杜閱同陳嘉琦獲得網民大力支持，復活回歸比賽，兩位選手份外有壓力，不過好在隊中有大魔王黃博做隊長，令兩位可以緩和緊張心情，杜閱喺呢段時間更特意跟老師惡補唱功。隊長黃博向組員派定心丸，大方表示每人都有自己優勝地方，大家都有不同貢獻。

另一位唱功去到天花級嘅選手劉洋，並選唱澎湃歌曲《我的歌聲裡》，原來事前劉洋好擔心歌曲嘅風格不合隊中兩位女將，更被王鄭浚仁爆對兩位女組員冇信心，要由佢親自說服劉洋，幸好經綵排後大家都信心爆棚，希望發揮最好水準。
蕭偉倫呢隊就有中聲大師兄沈宗賢出手相助。
而蕭偉倫呢隊就有中聲大師兄沈宗賢出手相助，佢哋跳出舒適區揀選譚詠麟嘅金曲《知心當玩偶》出戰，仲膽粗粗加埋跳舞上陣，胡家健形容呢支雖然係雜牌軍，但蝦兵蟹將打勝仗，為隊友注入強心針。
李創偉團隊以黑、紅色型格上陣。
講到造型方面李創偉呢隊以紅、黑色型格裝束上陣，造型震懾全場，隊中唯一女將善玥澄完全改頭換面。