郭富城台北開騷回憶初出道往事 方媛帶囡囡撐場林志穎喜見老友

郭富城 相隔5年再到台灣開騷，舉行一連三場小巨蛋演唱會，一開場城城就唱出今次巡迴嘅主題曲《EXIT》，雖然係廣東歌，但全場歌迷依舊報以熱烈歡呼。唱完第一首歌，城城即刻大賣口乖，話自己好掛住大家，對大家嘅愛更加係從來冇變過。

郭富城3場台北巡迴演出星期五晚開鑼
之後城城換衫，連續唱咗幾首當年喺台灣大熱嘅情歌，包括《傷心的話留到明天再說》、《我想偷偷對你說我愛你》，城城仲搞笑話想當年自己皮膚又好又有彈性，連牙齒都好白，氹得全場歌迷哈哈大笑，氣氛熱烈。
唔止重新修改歌單，仲大唱唔少當年大熱情歌

老婆方媛同兩位囡囡都有飛到當地欣賞

城城呢晚嘅演出吸引唔少圈中人嚟捧場，包括林志穎、賴雅妍、周蕙、王彩樺母女等，林志穎話自己開場前已經到後台同城城打招呼，對方更問候佢嘅身體狀況。而城城嘅太太方媛同兩個囡囡，都有到場支持。
老友林志穎一早到場打氣見面

城城為咗台灣嘅演出，除咗改咗6成歌單加重國語歌比例，連服裝同造型都重新設計過，務求比大家一場視覺聽覺盛宴。而演唱會最後，城城同全場歌迷一齊跳唱出道歌《對你愛不完》，劃下完美句號。