90歲南紅精神奕奕講近況預告「復工」 笑談與謝賢從未過電：佢點會追我

60年代粵語片著名女星南紅與資深大導演楚原相愛逾半世紀，鰜鰈情深，外出一直有影皆雙，自從丈夫於2022年離世，南紅一度暴瘦20磅，整個人變得憔悴；90歲南紅早前罕有現身好友楊紹鴻嘅網上節目，見佢打扮華麗花哨，精神奕奕，講起往事更不時流露出笑容，相信南紅已走出喪偶傷痛，目前由工人照顧日常生活，閒時尋找自己興趣。

90歲南紅早前罕有現身好友楊紹鴻嘅網上節目，講起往事更不時流露出笑容。
南紅當年喺光藝粵語片公司年代，跟謝賢、嘉玲及姜中平等人合作，楚原亦入光藝做編劇，由於二人年齡差唔多，有傾吓偈，南紅仲講過二人行埋9年都冇拖過手仔，當時唔知咩叫拍拖，南紅喺節目透露當年嫁畀楚原曾聽到閒言閒語，指佢唔嫁演員，梗係貪導演幫到好多，其實二人好少傾工作上嘅嘢，當時南紅喜歡讀書多嘅男人，讚楚原好有領導才能，而楚原係大學生有學識就增加咗好感。

60年代粵語片著名女星南紅與資深大導演楚原相愛逾半世紀，鰜鰈情深，外出一直有影皆雙。
南紅曾同謝賢、張英才、胡楓及周驄等60年代粵語片當家小生合作，南紅笑指從未過電，謝賢當時同粵語片紅星嘉玲一齊：「嘉玲梗係靚過我，佢點會追我，加上我又冇諗住愛情……我同謝賢都講過唔會鍾意對方。」

南紅笑指二人從未過電，謝賢當時同粵語片紅星嘉玲一齊。
南紅對於被指喺楚原離世後暴瘦，佢話當時自己太肥，加上老公又鍾意食嘢，成日跟住佢，體重達140磅：「我老公唔喺度之後的確係瘦咗，有兩年心情唔好，得番120磅，後尾心情好番，變咗130磅，我覺得而家啱我，人都靚啲。」南紅透露現時由工人照顧日常生活，上興趣班學嘢，間中同朋友唱K，南紅透露明年將與楊紹鴻去泰國唱戲。

南紅對於被指喺楚原離世後暴瘦，有兩年心情唔好，得番120磅。

南紅話當時自己太肥，加上老公又鍾意食嘢，成日跟住佢，體重達140磅。