中年好聲音3｜團戰組合有讚有彈導師暗揀卒 Eric Kwok狠批包尾大軍5人被Foul

星期日晚播出嘅一集《中年好聲音 3》，35位選手分為7組，按晉級次序由7首指定歌曲中選歌；三位導師谷婭溦、韋綺姍同謝文雅，於後台憑聲音盲選揀學員；團戰最低分的三組，共淘汰五人。 

團戰歌單同分數如下：《我的歌聲裡》91分-劉洋(隊長)、趙浚承、曹越、何 平秋、王鄭浚仁；

《到底發生過什麼事》88分-黃博(隊長)、任永健、羅逸軒、杜閱、陳嘉琦；

《大熱》81分-李創偉(隊長)、善玥澄、楊炳德、李金凱、陳溢光；

《小幸運》81分-張與辰(隊長)、侯靜伊、陸東成、劉曉昆、宗倩如；

《傾城》79分 - 陳芷盈(隊長)、林立峰、蕭樺堅、尤詩郡、郭偉倫；

《冷雨夜》75分 - 莫麗淇(隊長)、劉傳民、阮慧珊、Dan James、張家豪；

《知心當玩偶》73分 - 胡家健(隊長)、高菲、梁春茹、蕭偉倫、劉家溢

三位導師亦暗地揀選幾位唱將入隊，谷婭溦隊包括：張與辰、Dan James；韋綺姍隊：黃博、劉洋、阮慧珊；謝文雅隊：陳芷盈、任永健、趙浚承。

力量澎湃嘅劉洋獲選加入韋綺姍隊
本回合最高分嘅劉洋隊，喺分組後曾爆「失聲風波」，隊員趙浚承自揭食完蛇羹後突然失聲，綵排時亦未能唱歌，需由王鄭浚仁代唱；曾以男子組合Square出道嘅趙浚承謙稱「掹車邊」參賽，佢話：「心情好驚，我好鍾意唱歌，曾經出過道，之後離開做其他行業，放棄咗唱歌，覺得自己冇機會。同呢班人聚埋有共同喜好同愛好，好難得，我掹車邊跟住佢哋。」
趙浚承賽前食蛇羹後突然失聲，令佢非常擔憂

五人演繹《我的歌聲裡》贏盡全場拍掌聲，張佳添激讚：「你呢班人可以成團，好厲害！劉洋有一段發揮得非常之好， 其餘四個都冇失色。」周國豐亦讚劉洋音樂感強：「簡單幾句verse已將首歌帶到出嚟，整體五個人完全合格，冇可能foul你哋。」
發揮不俗嘅佢哋，最終獲得最高嘅91分

而屈居第二嘅黃博隊，亦獲周國豐大讚表現極佳：「個頭開得好好，三個女仔嘅穩定性令我哋好快進入到首歌。唯一要扣分係去到music bridge之後，chorus部分嘅力量，黃博係有啲要負責，力量去唔到將首歌推進再上一層。」

黃博隊以稍微之差屈居第二
不過加入擔任客席評審嘅Eric Kwok，就被黃博嘅演技吸引：「黃博企喺後面嗰幕，我好鍾意，佢好有戲，成個表情話畀你知隻歌講乜、唱緊乜，身為歌手有戲好緊要。」五人得悉得88分好成績，即擁作一團感動流淚，羅逸軒感觸良多：「我哋五個係好內斂嘅人，開頭讓得好緊要，行前一步又退一步，好開心你哋睇到我哋當中嘅合作。」
加入為客席嘉賓嘅Eric Kwok，對各隊表現有讚有彈

除了「養豬人」胡家健隊被Eric Kwok狠批台風騎呢，成為最低分包尾一隊，而得75分排尾二嘅莫麗淇隊，同樣被呢位客席評審直指係災難式演出，Eric Kwok話： 「團火喺呢個表演係冇撻著過，五個都好有character，但團隊表演我覺得係一個disaster(災難)。」
各隊團戰後分數

今仗共foul走五位選手入淘汰區，分別係《傾城》蕭樺堅、《冷雨夜》莫麗淇同張家豪，加上《知心當玩偶》劉家溢同梁春茹， 下集比賽將再次回到30強。

晉級30強選手名單

《中年好聲音3》星期日晚 20:30 翡翠台