安心亞蟬聯跨年晚會收視王 性感緋紅女神look全台最辣

啱啱過去嘅跨年夜，全台灣大型嘅跨年活動加歌手個人演唱會超過10場，當中有唔少歌手仲會連趕幾場，希望把握跨年騷呢個黃金機會，好好表現自己，而當中邊位歌手係今年台灣跨年嘅收視保證呢？答案係2號出爐，就係女神級嘅安心亞，而今次已經係佢連續第三年蟬聯跨年收視冠軍寶座。
安心亞連續第三年蟬聯跨年收視冠軍寶座。
安心亞今年選擇喺新竹陪大家跨年，當電視直播安心亞唱歌時，收視飆升，觸及人數有大約38萬人，成為當晚收視最高點，心亞得知消息後非常鼓舞：「很開心，大家喜歡我的表演，也希望新的一年大家喜歡我的新歌。」
安心亞指開心大家喜歡佢嘅表演。
心亞當晚以金髮、低胸、熱褲加網襪嘅全新「緋紅女神」造型登場，連唱13分鐘快歌組曲加勁歌熱舞，仲喺鋼架上攀爬穿梭，性感迎接即將到來嘅「金蛇年」。心亞仲大賣口乖為大家送上祝福：「祝福2025年大家的生活熱血、愛情熱火、事業熱烈，各方面都能紅紅火火」。
跨年夜，安心亞以「緋紅女神」造型登場。