馮淬帆相隔5年再登大銀幕 何超儀認同「人比鬼可怕」

神隱多年嘅馮淬帆，早前出山與金鐘獎最佳女主角尹馨、何超儀、曹佑寧及安心亞等演出錢人豪執導、以台灣著名猛鬼大廈為藍本嘅電影《鬼們之蝴蝶大廈》。日前錢人豪更親身飛到香港出席電影特別場，興觀眾進行深度分享，當日黃夏蕙及演員陳建興亦有出席。
錢人豪（前排左3）出席電影香港特別場。
電影中嘅「蝴蝶大廈」係以台北著名凶宅「錦新大樓」為藍本，該大廈於過去20多年曾發生過非常多意外，錢人豪表示佢哋嘅電影由前年開拍後，已先後發生六宗跳樓案，不過由於該大廈唔畀劇組進內拍攝，故劇組只好搭建場景，雖然係搭建，但錢人豪指拍攝時都有唔少靈異事件：「那個場景裏的假廁所，一直都聽到沖馬桶的聲音。」
陳建興、黃夏蕙及錢人豪。
錢人豪想藉電影最想表達「人比鬼可怕」，佢指鬼都會講道理，但人就唔會，而導演呢個睇法就同何超儀嘅睇法相同，Josie喺電話訪問中表示：「我絕對相信人比鬼更可怕，我曾經有過多次撞鬼經驗，但係佢哋都冇惡意，只係可能會有啲要求，亦都唔會傷害你。但係人唔同，人可以為利益出賣至親，甚至不擇手段，呢樣比鬼可怕好多。」
何超儀認同人比鬼更可怕。
提到同片嘅馮淬帆，Josie指對方嘅電影係陪伴住自己成長，亦帶畀香港人好多歡樂回憶，而佢最欣賞嘅就係對方喺《癲佬正傳》入面嘅細膩感人演出，不過可惜嘅係今次喺戲中Josie同對方冇對手戲。
馮淬帆神隱多年再出山拍戲。
已經有一段時間冇喺大銀幕演出嘅馮淬帆，笑指由於自己係天才型演員，所以從未刻意為拍攝準備，仲過事前設計太多反而會太用力。至於問到佢入行多年有冇遇過靈異事件？馮淬帆就分享曾經見過劇組人員疑因隨地小解而得罪鬼神，突然對住大樹狂打，所以自始之後佢每次出外景，都會用中、英、台語同廣東話講「唔該借借」。提到近年生活，馮淬帆坦承自己患有糖尿病，所以近年飲食都好清淡，平時最鍾意就係約朋友一齊打桌球，生活相當愜意。
曹佑寧
主演嘅曹佑寧亦喺電話訪問中，分享自己拍攝時遇到嘅靈異事件：「通常在開拍前都會拜拜（拜神），但那天我沒有拜就直接到了現場，結果我在看燈光的時候，攝影師叫我往後一點，一往後，燈具就從我的前方落下，大家就有點嚇到，然後我就趕快去拜拜。」
安心亞戲中造型好嚇人！
戲中同曹佑寧同馮淬帆飾演兩爺孫，但戲中佢哋就冇對手戲，反而同白靈就有唔少，曹佑寧仲指白靈進入角色後就無法被打斷：「有場戲，白靈姐要守住她的雜貨店，她要做很多情緒性的表演，她進入角色之後，發瘋起來真是完全沒有辦法被打斷，喊Cut之後，過了10秒到15秒，她還在繼續發瘋，真的非常厲害！」
錢人豪分享自己個人經歷。
有人話電影嘅風格就該導演嘅性格縮影，自言唔會拍小情小愛嘅錢人豪，表示好多人都以為佢拍嗰啲荒誕誇張暴力冷冽嘅社會底層黑暗，都係佢臆測幻想出來，但錢人豪明確表示以上都係佢曾經歷過嘅生活，亦因為佢年輕時曾喺街頭打拼，所以先會指人往往比鬼可怕。