王祖藍45歲生日獲兩女送香吻 拍片教農曆年應付長輩方法

農曆新年就到喇，唔少情侶都為咗要去另一半拜年見家長而緊張，身為人夫嘅 王祖藍 話自己第一次去同太太李亞男嘅家人食飯時，亦緊張到將媽媽嘅家姐叫成「姐姐」，又將媽媽嘅阿嫂直接叫「阿嫂」，所以佢相信唔少人都會遇到呢個問題，有必要拍片教大家點樣應付呢啲情況。
祖藍拍片教大家喺新年期間，點應付另一半嘅長輩。
祖藍就話如果大家係首次見面嘅，就一定要知己知彼，問定另一半呢次見面會有啲咩家庭成員會出席，佢指呢一點係非常重，因為咁樣你先有個底，知道自己將會面對咩人。而見面時祖藍就提醒大家講嘅嘢唔好太油嘴滑舌，要以誠相待。至於點樣可以快速同大家打開話題同拉近關係？祖藍就話可以睇下另一半嘅相、講下對方小時候嘅趣事，又或者可以同長輩們傾吓佢哋有興奮嘅話題，好似養生、旅行等，總之就係順住長輩們鍾意嘅話題咁去傾，然後真誠咁去回應對方，咁就會離變成自己人呢日唔遠喇。
祖藍仲分享自己嘅經歷。
除咗點樣打開話題外，祖藍仲教大家要識睇人眉頭眼額，去到另一半嘅屋企時記得要放低手機，唔好做低頭族之餘仲要細心觀察，見外母去煮飯時，記得主動問下有冇嘢可以幫手，好似幫大家盛飯、拎碗筷，食飽後幫手執枱等。祖藍又分享自己第一次去另一半屋企時超級緊張，對方嘅長輩飲咗少少茶後，就即刻問要唔要再添啲茶，食咗少少飯又問要唔要添飯，反正就係超級緊張。
提大家去到另一半屋企千祈唔好只顧住玩電話。
首次上門作客當然唔可以兩手空空，祖藍指首次送禮呢件事係相當重要，一家要為每位家庭成員都準備好禮物，就連寵物都唔可以忘記備禮，而送畀長輩嘅禮物更加要多注意，好似如果送食嘅嘢就要注意健康同營養，另外亦可以考慮送下符合習俗嘅禮物，好似過年可以送蘭花，當你大包小包咁上到門拜訪，街坊鄰居見到後外母都覺得有面啦。
9 號係祖藍嘅45歲生日。
另外，9號係祖藍嘅45歲生日，太太李亞男同兩個囡囡王天韻Gabby 同王海靜Hayley就為佢開咗個生日party，兩個囡囡仲好識做咁送上生日香吻，而祖藍就喺社交平台上表示： 「愛的人都在身邊，是我45歲最好的生日禮物。」
三位美女為祖藍送上香吻。祖藍話愛嘅人都喺身邊，就係佢45歲最好嘅生日禮物。