莊錠欣香港首次個唱月底展開 接受家燕姐訪問重提年幼拍劇時光

童星時代已入行嘅前韓國女團CLC香港成員 莊錠欣 即將於香港展開首次個人演唱會，Elkie早年曾係 薛家燕 旗下嘅學生少女組合Honey Bess隊員之一。日前佢接受家燕姐嘅電台節目訪問時，兩人就重提當時嘅印象喇。

莊錠欣月底就會於香港舉行首次個唱
9歲已出道嘅 Elkie指，當年同家燕姐拍劇嘅記憶非常深刻，佢話：「當年同家燕媽媽拍《富貴門》，反而唔太記得返學的事，拍戲嘅事就記得好清楚。」而家燕姐就讚Elkie讀書成績好好，兼顧學業之餘，有演技又乖。家燕姐指：「當年Elkie只得9歲，其中有場感情戲，佢只係喺在旁邊睇，都投入到眼濕濕。嘩！嗰陣已覺得佢好好戲。」
Elkie早喺9歲已入行拍劇，十多歲就加入韓團

去年11月於台灣舉行完個人騷嘅Elkie，當時曾獲好友 周子瑜 現身支持，而全場座位爆滿亦令佢非常振奮。Elkie仲指自己由歌單到幕後所有策劃、主題都親力親為，非常享受可以聆聽到歌迷想要嘅。
11月於台灣開騷時，好友周子瑜都有支持

至於26號就舉行嘅香港演出，Elkie就透露會重編歌單，而主題就會同台灣個唱一樣。佢透露：「大家陪住我一齊成長同時睇住我發光發亮，我哋互相陪伴，希望陪我長大的觀眾會感動。」