百億富豪三角戀丨五索鍾睿心炫富事蹟 自信帶住5子都可搵個更有錢

自爆曾經係街市妹嘅Rachel，話自己細個係住喺大埔唐樓，由於棟唐樓係喺街市入面，所以佢細細個就見慣老鼠曱甴，亦因為咁令佢立志要做個有錢人，揀另一半嘅條件就係要對方夠疊水！Rachel雖然已經係5子之母，但係保養得宜，身材超好，平日嘅活動除咗炫富外，就係同好友裕美一齊拍片，間中亦會喺片中以「富商A」嚟代步另一半，講下同對方嘅生活瑣事，例如佢哋每個星期六都會出海、「富商A」陪囡囡做功課、同「富商A」一齊揸古董跑車等。

早前裕美就係片中問Rachel點解屋企會有咁多工人，而咁多位工人都係冇咩，只係用number嚟做代號，當時Rachel就話：「梗係啦！我狗都有4隻，小朋友都有5個，我十指不掂陽春水㗎！」之後又話會叫工人幫佢捽腳趾罅，原因係因為腳趾罅要保養，不過就唔知Rachel係講真定講笑喇。

而喺另一條片中，裕美就指Rachel非常離地，就連早前「何生何太」呢個熱爆話題都唔知，而當時Rachel就指自己從來唔會睇窮人新聞，由細到大都會自動過濾咗啲窮人新聞，只會對豪門爭產案、豪門婚禮、嫁入百億少奶呢啲新聞有興趣，之後Rachel話自己聽完裕美講後都有睇過兩條何生何太嘅片，佢指完全唔覺得有咩問題，仲表示自己平日都係咁講嘢，又指： 「貪另一半錢係好正常」。

講起豪門新聞，早前 Kayan9896 同名媛薛芷倫長子馬桂烽分後手，被指豪門夢碎，Rachel亦曾拍片講過呢件事，力撐Kayan9896嘅佢表示：「笑乜嘢呀？咩豪門夢碎？你唔畀佢下一個更加有錢㗎？」之後仲以自己做例子，豪言：「我帶住五個啊，我都可以搵個更加有錢嘅，呢個就係我嘅能力。」可見Rachel相當有自信！