丁子朗內地拍劇勁緊張 感謝師傅霍建華畀信心

丁子朗近年除咗演藝事業外，佢亦發揮藝術潛能開畫展，最近佢同酒店聯乘製作賀年禮盒封面，呢日佢就舉行咗一個小型畫展，好友宋宛穎同余宗遙都有嚟支持。
丁子朗呢日舉行小型畫展。
丁丁話自己用咗兩、三個月嚟設計呢啲封面，由於前陣子自己都比較忙，所以試過去外景拍攝時都帶埋幅畫去畫。講到自己最滿意嘅作品，丁丁指係身後backdrop嘅畫作，佢仲指呢幅畫所選用嘅豆沙紅色，係寓意吉祥同幸福，所以佢希望將呢個祝福語送到每個人嘅家中。
丁丁話身後呢隻豆沙紅色係有寓意。
正喺內地拍劇嘅丁丁，今次係專登度期返港出席活動，佢指套劇預計拍到農曆年後先再返港，丁丁話好開心可以參與到呢次大製作，又指劇中最多對手戲嘅係同佢師傅霍建華，好開心可以近距離同對方偷師。丁丁話雖然自己普通話都叫做OK，但因為始終唔係母語，所以都有啲壓力，加上內地拍攝唔興有NG，所以當自己NG時都好緊張，而呢個時候師傅霍建華就會不斷安慰同畀信心佢，令佢覺得感恩又窩心呀。
丁丁話感謝師傅霍建華嘅鼓勵。
早前去咗泰國旅行嘅丁丁喺社交平台派福利大晒騷肌相，佢話自己係趁入劇組前放鬆一下，講到點樣keep身材，丁丁就指每日拍劇前自己都會去做gym㗎！