李司棋遇網騙訛稱過錯數索回「手術費」 用《溏心風暴》大契金句鬧爆騙徒

李司棋（司棋姐） 近年活躍喺社交平台，不時於網上分享生活日常，尤其佢教煮嘢食更係大受歡迎，司棋姐前日喺社交平台上載一張聊天對話截圖，指自己遇上「網騙」，更以TVB經典劇集《溏心風暴》嘅金句擊退騙徒！

該騙徒訛稱唔小心過數過錯咗2千蚊畀司棋姐，並附上一張疑似過數截圖為證，叫司棋姐過番數畀佢，仲聲稱「屋企人要畀手術費。佢糖尿上眼，唔即刻做手術，即刻會盲」，呢啲詐騙招數嘅技倆，點會呃到一向精明嘅司棋姐。

司棋姐第一時間意識到呢個係騙徒，司棋姐表明自己冇收過呢筆數，仲回覆「即係有呢$2000就唔使盲？名副其實見錢開眼喎！糖尿好長手尾，真係會上眼，叫你位親戚戒口啦」。騙徒都係唔死心，繼聲稱該位親屬就是自己阿媽，司棋姐只好反問：「係喎，你母親知唔知你做啲咁嘅嘢？我意思係過錯數！做個手術先$2000幾抵，佢可以唔戒口，有咩事咪做多次手術囉」。

騙徒仍堅持問司棋姐「轉數了沒」，司棋姐只好出動《溏心風暴》大契氣場，以錄音鬧爆騙徒「我睇人睇咗幾十年喇！邊個係人邊個係鬼我睇得出！想呃我？我呃大㗎」，以經典金句成功擊退騙徒。不少網民留言讚司棋姐，同時亦呼籲老人家遭遇此事應該謹慎處理。