方健儀訪吳文忻曝抗癌心情 積極抗病謀康復圓歌手夢

前主播 方健儀 早前開設個人頻道，訪問各界女性。而早前公開患癌而以積極態度面對同抗病嘅 吳文忻 ，日前就接受訪問，分享佢嘅抗癌經過同內心世界。一頭短髮嘅吳文忻精神十足，經歷鉅變亦令佢心態更加豁達，佢指：「當時係去推淋巴，推油師發現我胸部好似有硬塊，佢叫我去檢查吓，去到醫生度唔比我走，即刻要『造影』，真係好痛！」

積極抗癌嘅吳文忻早前接受方健儀訪問
Natalie指檢查當日係農曆新年前夕，心急要為囡囡準備生日會，所以只接受手術而拒絕化療療程：「我好怕家人知，驚佢哋擔心我，好低調咁入院做完手術就出院。因為我冇做化療，每半年就要去檢查一次，直到上年4月，腫瘤再次變大同埋擴散，我唯有接受化療同埋講出嚟俾人知。」
原來首次發現癌症時佢為囡囡生日而拒絕接受化療

憂慮家人擔心嘅Natalie之前一直未開口道出病情，佢亦分享其中原因：「我唔知點同啲小朋友講，到化療前兩星期，覺得要講喇，我話『媽咪生病，係癌症。』，我以為囡囡會好擔心，點知佢話『我係咪要幫你鏟頭髮？』，或者呢個都係教育之一。」
去年復發後佢無奈下向囡囡透露病情

早年篤信風水，曾為保事業而「改名」為吳忻熹嘅佢又話：「以前『吳文忻』呢個名係『大凶』，唔係『大胸』呀！加上做娛樂圈，大把風水師傅出嚟幫你『指指點點』，但你依家經歷生死，我都睇得好透，依家叫返我做『文忻』都唔會介意。」
曾因風水而改名嘅佢指，經歷大病後睇化好多事

公開患癌初期，曾收到四方八面大量信息，原來曾令佢非常苦惱：「好多朋友短訊嚟都叫我唔使覆，但係有一個唔係咁熟嘅朋友就好肉緊問候，搞到我都唔知點咁，好似聽日就會死咁！」近來康復進度理想嘅佢，仲希望圓歌手夢想，揚言病癒將推出歌曲。
又指一待病癒就要推出歌曲圓歌手夢