苟芸慧開腔回應婚變傳聞 用意味深長笑容回答單身問題

好耐冇喺香港出席公開活動嘅苟芸慧，近年屢傳同老公陸漢洋嘅婚姻出現問題，難得呢日苟芸慧以一身火紅低胸裙現身活動，當然要向佢查詢一下婚姻狀況啦！
問到苟姑娘今年係咪仲要派利是？佢就話年年都會派利是嘅，不過今年呢個咁私人嘅嘢就暫時唔講住喇，當傳媒讚佢keep得咁fit，有冇追求者？苟姑娘就沉默咗好一陣，先話自己好似冇追求者，至於問到佢係咪available歡迎人追？苟姑娘即露出一個意味深長嘅笑容，又指傳媒問啲咁深嘅問題，之後佢又話新一年希望大家都有新嘅開始，開開心心身體健康。

苟芸慧呢日出席活動狀態甚佳，不過提到感情狀況就不置可否
之前有傳苟姑娘同老公其中一條令婚姻亮紅燈嘅導火線，就係二人對生育冇共識，據知苟姑娘一直好想便媽咪，但就遲遲未有好消息，呢日苟姑娘講起好友鍾嘉欣囝囝即母愛泛濫，仲讚對方好靚仔，笑言想帶對方返屋企呀。苟姑娘指而家自己有七隻狗狗，但就未有小朋友，所以暫時只可以玩住朋友嘅小朋友先。
呢日講起鍾嘉欣嘅三個小朋友，感受到佢非常想要BB

之前一直養尊處優嘅苟姑娘，呢日就預告嚟緊會全面復出，佢又指因為之前去完鍾嘉欣個演唱會，先發覺原來大家仲掛住佢，苟姑娘笑言一直以為大家都已經將佢忘記咗，所以嚟緊都會接返多啲工作，除咗拍劇外，苟姑娘話仲想學唱歌，至於問到有冇睇中邊個新生代演員？苟姑娘就話唔覺得自己有資格睇中人，有緣份合作已經好開心。

苟姑娘又指自己即將復出，往後會更多機會同大家見面