中居正廣宣布退出演藝圈 涉嫌捲入「性朝貢」風暴致事業全毀

日本前天團SMAP成員中居正廣因涉嫌捲入「性朝貢」事件，1月23日喺私人付費網站發出引退公告，宣布即日退出娛樂圈，而佢所經營嘅公司Nonnbiri Nakai株式會社亦會喺完成已接落嘅工作後結束營業。 

日本前天團SMAP成員中居正廣因涉嫌捲入「性朝貢」事件，發出引退公告，宣布即日退出娛樂圈。

中居喺去年年底被雜誌爆料，涉嫌喺飯局暴力性侵一名富士電視台女主播，事後向女方支付9千萬日元作為掩口費。醜聞曝光後，中居喺1月9號發表回應：「確實有問題存在」，不過雙方已經進行和解，亦不存在報道所指「使用暴力」，當時中居更認為呢次事件唔會影響演藝生涯，將會繼續活動。 

中居喺去年年底被雜誌爆料，涉嫌喺飯局暴力性侵一名富士電視台女主播，事後向女方支付9千萬日元作為掩口費。

中居聲明發出後惹來外界對佢更加不滿，佢所主持嘅電視、電台節目亦通通被抽起停播，加上再有一名女主播控訴電視台惡行，承認自己係受害者，事件越鬧越大之餘亦牽涉一位富士台高層長期安排女員工進行「性朝貢」，即使社長港浩一上周召開記者會公開道歉，仍然無法「救火」成功，目前為止超過50間企業抽起廣告，保守估計富士台會損失幾百億日元收入。 

中居向粉絲及受影響嘅人道歉，自言冇諗過會用呢個方式同大家告別。

中居喺今日嘅引退聲明中亦表示：「選擇今日宣布引退，係因為同我合作過嘅各大電視台、電台、廣告贊助商完成解約、停播、辭演等問題，而選擇喺今日發表聲明。」佢又向粉絲及受影響嘅人道歉，自言冇諗過會用呢個方式同大家告別。目前，中居亦已經刪除自己嘅官方社交帳號。