華納總動員歌手2月中開騷 全體密集準備過年要戒口

有唱片公司旗下12個歌手同樂隊單位，參與2月15日中舉行嘅音樂會， Dear Jane 陳蕾 洪嘉豪 MC張天賦 Gareth.T湯令山 Gigi張蔓姿 Kiri T moon tang Zpecial Lewsz Nancy Kwai歸綽嶢 Gordon Flanders 總動員現身演出，消息一出仲即刻有樂迷估歌單喇。 

農曆新年仲有幾日就到，所以歌手「度期」綵排一啲都唔易，嘉豪就笑言新春期間要拉大隊「洗劫」Dear Jane 嘅Tim同Jackal，佢話：「因為結咗婚嘅同事唔係好多個，仲要阿Jackal哥新婚，一定要比佢感受『派利是』嗰種喜悅」 

洪嘉豪已經決定新年要洗劫阿Tim同首年派利是嘅Jackal喇

至於陳蕾就話要「閉關」練歌，同時為來年新作搵靈感：「因為過去一年都好忙，冇咩時間可以喺屋企靜吓，可以把握機會喺屋企寫歌找數，又可以靜吓諗吓未來嘅方向！今次呢個騷好多Medley要唱，記極多嘅歌詞之餘，仲要好多舞台嘅走位，隨時難度高過自己嘅演唱會。」 

陳蕾話要趁新年假期閉關充電，同時搵搵新作嘅靈感

早前佢哋齊集公司玩遊戲，要畫出其他歌手喺自己心中嘅形像，洪嘉豪抽中畫師妹moon tang，更「三秒鐘」畫完，事關對方「太細粒」輕易完成！而張蔓姿就將陳蕾變成「士多啤梨」眼，更指對方台上永遠都係發光。 

MC就稱為呢個新年首個演出唔敢鬆懈，揚言要戒油過年：「因為平時過年好多油炸嘢食，但係呢個騷同新年太近，我怕食太多會影響聲帶，所以今年會『清清地』過年。聽聞所有女歌手會跳舞，Dear Jane 同Zpecial仲會Cross Over！（三寶同台？）大家幻想吓啦，到時咪知囉。」

MC已預告為今次演出過年會戒口咁話

 Dear Jane主音Tim就指同兄弟「日日見」，過年期間想「唞一唞」：「其實除咗Dear Jane成員之外，其他歌手同事都因為School Tour日日見，所以過年不如陪吓老婆仔女啦！今次呢個騷好多新嘅『組合』出現，到底邊個會夾邊個都仲未知，不過我地Dear Jane夾咩人都得，到時有音樂自然好High！」

阿Tim亦話日見夜見隊友太過冤，放年假要避一避呀