張敬軒忙足成年初三收爐放年假 麥玲玲批娛樂圈蛇年較多地下情

大年初三農曆新年賽馬日，張敬軒打頭炮唱響馬場，祝大家新一年花開富貴，初四就係軒公生日，唔少歌迷大派利是，軒公邊演出邊逗利是，可以話係滿載而歸。
大年初三軒公到馬場獻唱。
軒公忙足成年，初三先正式收爐，生日放兩星期年假，畀自己好好休息，軒公暫時未諗外遊，想搵個地方放鬆自己，唔想去外地行街買嘢仲攰過返工，軒公坦言係化妝嗰陣收到蛋糕，先記得1號係自己生日，又指自己由細到大冇生日特別慶祝，生日正日就簡單同父母食餐飯。
玲玲師傅為肖猴嘅軒公預測喺蛇年有桃花。
軒公早前喺年廿九晚同一班同事去老闆楊受成屋企拜年，佢做埋吉祥物跟在場同事合照，又即場獻唱，佢話好難得咁齊人相聚，軒公稱呢個係傳統嚟，逢年三十晚同屋企人食好團年飯，就去楊生屋企拜年，今年冇年三十，佢哋就相約年廿九團拜，軒公話老闆屋企大到容納600人。
玲玲師傅話今年娛樂圈有好多地下情。
同場有麥玲玲師傅亦有傳授開運錦囊，玲玲師傅更預測肖猴嘅軒公喺蛇年有桃花，遇到合適嘅人機會大啲，玲玲師傅指軒公啱同肖龍、肖鼠、肖蛇嘅人幾夾；今年蛇年娛圈比較多地下情，有啲大纜都扯唔埋嘅人走埋一齊，玲玲師傅笑指傳媒朋友今年會好忙。
Nowhere Boys