中年好聲音3｜「生命鬥士」李金凱失雙臂無阻正面生活 阮慧珊患長期病視如打機關卡

聽晚播出嘅一集《中年好聲音3》中，27強競賽部分將圍繞「節拍勁歌」以及「心酸悲歌」兩個主題進行，選手將每3人一組共分為9組出賽，根據上回合得分；實力相若嘅3位選手會編入同組進行PK賽，而當中最低分一人就會跌入中年危機區。

本回合將分3集播出，每集會有3組共9位參賽者輪流出場，當所有選手完成演唱後，評審會喺危機區中3選1淘汰1人，本回合最終將淘汰3人，正式誕生24強選手。
27強爭入24強PK戰，今晚將播出第二集

大年初五播出嘅係27強3人PK賽嘅第二輪比賽，2個「勁歌組」及1個「悲歌組」將先後演出，演唱歌單如下：李金凱《那些感動過人的歌》、善玥澄《Revolution》、阮慧珊《神奇女俠》、劉曉昆《往日情》、占士丁丁《Glimpse of Us》、侯靜伊《我懷念的》、宗倩如《拒絕再玩》、陳溢光《黑色狂迷》及楊炳德《愛情陷阱》。
李金凱被譽為「身命鬥士」，更令評判都動容

其中被封為「生命鬥士」嘅李金凱成為整集焦點，佢10歲時因為誤觸5千伏特高壓電致失去雙臂，更導致永久傷殘，佢將廣東歌對自己嘅影響娓娓道來；音樂亦幫助佢渡過失意嘅童年：「小時候我的手還在喲，跟朋友在一起會打架、 會胡鬧、會看《英雄本色》、會想到《當年情》，廣東歌和香港電影陪伴了我整個童年。」
年幼時佢因為誤觸高壓電而失去雙臂

正正因為廣東歌同香港電影嘅陪伴，令童年遭受巨大傷患嘅金凱，一、兩年時間就走出傷痛，佢坦言選唱《那些感動過人的歌》，係想表達「就算我什麼都沒有，我也有歌聲陪伴我」。 金凱全程面帶笑容、輕快自如唱出參賽歌曲，唔止再令「喊包」婉婉同肥媽瘋狂落淚，就連黃凱芹(Chris)亦感動到雙眼通紅；不過金凱完全未被影響，仲掉轉為大家講笑話緩和氣氛，令婉婉大為讚嘆：「所以我成日都話佢啲attitude，真係(正面到)頂唔順。」
佢嘅演出同正面態度令人非常敬佩

Chris更俾出20分滿分：「你成張嘅歌詞我係冇打過一個叉，再加上你情感嘅表達、你嘅節奏、律動感，同埋你自己嘅聲底同音色，我只能夠加分、 唔能夠減分，所以20分我已經畀少咗你。你搞到我喊，係咪要扣你分呀？」
喊包肥媽聽到落淚

張佳添則一針見血點出金凱值得令人敬佩的地方：「你係其中一個我最欣賞嘅參賽者，唔單止因為你唱，係你成個人嘅態度、能量，好似你想整實啲個ear mon，你唔會叫人幫手，你會自己整。我自己都試過，但我個膊頭係冇可能掂到耳仔，呢個attitude真係非常之好。」
婉婉對金凱嘅積極亦一樣感觸

與李金凱同樣以積極態度面對人生挑戰同難關嘅，仲有同佢同組、身患第一型糖尿病嘅阮慧珊，選唱《神奇女俠》嘅佢，認為人生似係一場遊戲，每個玩家都有自己嘅武器同限制，即使面對任何設定，只要盡力都可以贏到最後，佢話：「我嘅限制係我每日都要打針去延續我呢場遊戲，但換個角度睇，其實呢個所謂限制都係遊戲設定啫，人生好多時都有好多難關，同打機一樣，你要挑戰咗難關你就可以賺到一啲技能。」
阮慧珊雖然患病，但就一樣正面又積極面對人生

為咗令表演更具新鮮感，兩年前開始習舞嘅佢，更為自己排舞，又喺歌曲中段加插一段機械舞，勇於挑戰自己嘅的態度令人折服，連出名要求高嘅周國豐都鼓勵話：「你今日可以拋開平時嘅comfort zone，去呈現另一種慧珊感覺，我覺得係值得鼓勵。」肥媽更搞笑話：「冇諗過家庭主婦可以突然咁變，我戥你老公擔心。」
呢集更自編舞步演出

《中年好聲音 3》逢星期日晚 20:00 翡翠台