何超蓮名下慈善機構蛇年辦名人販賣會 少爺占捐逾千件衣物販售行善

少爺占 與 何超蓮 今個周末，將舉行名人物品慈善販賣會，收益扣除成本開支後，將全數捐予由超蓮創立嘅慈善機構 Smile With Us HK 。少爺占同超蓮多年前因為品牌慈善活動結緣，為善最樂嘅佢哋，今年決定蛇年伊始就決定再次行善積德。

少爺占參與超蓮名下機構舉辦嘅慈善販賣會，日前仲齊齊落手印衛衣
今次除咗阿占之外，超蓮 倪晨曦 關智斌 丁子高  形象指導崔乘飛 Dear Jane嘅JACKAL 陳健安張蔓姿、張蔓莎姊妹 跳高女神 楊文蔚 王友良 當奴 朱薰 麻利 梁文禮 等都有捐出物品。阿占仲笑言希望以少少綿力協助有需要嘅人，仲可以順便幫今年本命年嘅自己積福咁話。
大批名人嘅物品今個星期五起供善心人購買

今次阿占共捐出近千件衣物販賣，佢仲話：「咁貴買層樓返嚟，原來全部位用晒嚟擺衫！」早前佢就同Smile With Us HK嘅義工，為販賣會重新印製衞衣，寓意新一年所有境象都可以有機會重來，人人都可以有新開始、新氣象。
捐出大批衣物嘅阿占，話希望新年有新開始咁話

初嘗親手印製衣服嘅超蓮更大讚好玩，仲激發自己創立自家服裝品牌嘅想法，希望下一次可以再親手同義工一齊印製團服。而蛇年開始已經可以同義工們一齊行善認為係非常好嘅開始，希 望今年大家都事事順利、笑口常開。

超蓮同大家齊齊印衫，仲令創立自己品牌嘅Idea更強烈