大S日本香消玉殞震驚華人社會 前夫舊拍檔神傷緬懷故人

台灣藝人 大S 徐熙媛 於日本病逝震驚華人社會，消息傳出後，同大S仍有官司纏繞嘅內地商人前夫 汪小菲 隨即與現任妻子中斷泰國度假行程飛抵台灣，佢抵達機場時一直表情憔悴，向傳媒合十又指大S永遠都係自己家人，晚上佢又於台北寓所附近冒雨出現，亦再一次向採訪嘅傳媒鞠躬。

汪小菲於大S離世後急趕返台灣
至於喺《流星花園》中飾演「杉菜」父親嘅 董至成 呢日喺活動後接受訪問時，就指心情非常難過，對大S年僅48歲就離世非常心痛。雙方一直有保持聯絡，日前大S仲曾傳訊息向佢拜年祝福，雖然合作已係廿多年前嘅往事，但係董志成指大S當年已經非常敬業，既聰明又靈巧，而《流星花園》漫畫版原作者 神尾葉子 亦轉發新聞哀悼，更大讚佢嘅可愛笑容令自己留有深刻印象。
董志成指早前先接受大S嘅新年祝福

《流星花園》原作者神尾葉子亦於社交平台悼念

另外，歌手品冠驚聞大S離世消息非常愕然，而佢同大S兩家小朋友原來係同校同學，不時都會喺學校活動遇見，仲指大S非常關心子女嘅情況。

品冠同大S嘅小朋友就讀同一間學校，不時都會遇見對方