楊受成率英皇藝人團拜 歐陽震華稱加入半年過得相當刺激

英皇娛樂於6號晚舉行新春團拜，集團主席楊受成博士 與 霍汶希Mani 率領 泳兒Vincy、歐陽震華、女團VIVA、周家怡、溫碧霞、陳國邦、楊天宇、曾傲棐Arvin、艾妮Elly、洪助昇、海兒等出席。而為慶祝去年英皇電影開拍嘅《破．地獄》票房大收一億六千多萬，老闆楊博士更即場舉行抽獎環節，氣氛熱鬧。
楊受成即場舉行抽獎。
去年加盟英皇嘅歐陽震華，首次參加公司嘅新春團拜，佢話：「好開心，因為我好多年冇參與類似嘅活動，以前喺TVB好似冇呢個環節，團拜就有，但一齊食飯就冇。」

歐陽震華又指新公司呢半年，自己覺得相當刺激，因為做咗好多以前咁多年都冇試過冇做過、甚至自己冇諗過嘅事，當中包括參加內地歌唱節目 《聲生不息》，歐陽震華表示：「初初我都覺得好似唔係好關我事，呢個節目唱歌嘅個個都係樂壇天花板，但公司話關我事，因為嗰一集係講港劇主題曲，所以好適合我呢個身份上去，因為我實在拍太多港劇啦！」
楊受成率眾人團拜。
歐陽震華指當時自己相當緊張，因為驚失禮公司同香港演員：「一唱完我問公司同事有冇走音，佢哋話冇，我唱歌冇乜嘢技巧，只係真心演繹一首歌俾觀眾聽。」至於蛇年願望，歐陽震華就表示希望大家都身體健康，冇疾病、冇戰爭。

而大師姐Vincy則主動出擊派利是，又笑言屬狗嘅自己今年會行運，由於日前Vincy推出嘅新歌叫《無糖可樂》，所以喺團拜時佢全程以「無糖可樂」祝酒，趁機打歌。