姜大衞盼下世再做夫妻 李琳琳自稱不合格向子女道歉

姜大衞John哥 同 李琳琳 係影壇出名嘅模範夫妻，結婚51年仍然恩愛如昔，早前佢哋一同接受電台《舊日的足跡》訪問，除咗分享二人嘅演藝路外，仲不時喺訪問中打情罵俏，盡顯甜蜜。
姜大衞同李琳琳係影壇出名嘅模範夫妻。John哥不時會喺社交平台曬出同太太嘅合照。
去年John哥首獲提名香港電影金像獎就成功奪得「最佳男配角」，太太李琳琳亦憑電影《從今以後》入圍「第 18 屆亞洲電影大奬」最佳女配角，呢次亦係佢從影以來首獲電影奬項提名，不過琳琳姐就坦言無信心奪獎：「我經常看電影，看到很多演員的演出十分自然，很投入角色。我在這部戲的出場時間不是太長，能夠獲提名已經是我的得着。」笑言喺佢62年嘅演藝生涯中，總算得認同，令佢好開心。而John哥對太太嘅演出表示百分百支持，佢仲笑言睇完電影後，都曾經懷疑太太係同性戀。
《從今以後》劇照。

入行70多年，John哥坦言曾經見過前輩演員由大明星慢慢變成配角，甚至特約演員，所以佢對呢啲行早已睇通睇透，亦明白演員呢行唔會永遠喺同一個位：「現時我當男配角，可以保持配角位置已經非常好。如果再退下去，相信我也不會再做了。」
姜大衞同李琳琳相愛多年。
喺John哥眼中，琳琳姐係完美嘅另一半，不過琳琳姐就話自己又懶又唔識做家務，係個唔合格嘅太太，同時亦要同佢嘅子女講句對唔住：「我也要向子女說句對不起，因為他們的媽媽是個執着的人。大女依蘭很乖，過時過節必會好好安排。」至於問到佢會唔會為囝囝姜卓文嘅婚姻大事而着急？琳琳姐指認為男孩子要有能力養家先好談婚論嫁，唔使大富大貴，但一定要有經濟基礎，所以佢並唔心急。
李琳琳對囝囝姜卓文嘅婚事並唔心急。

情人節將至，車淑梅問到呢對結婚51年嘅夫妻將會點慶祝？John哥娓娓道出佢嘅愛情觀：「兩夫妻經過不同階段，有激情、愛情、感情，現時是互相需要對方、不能沒有對方的時候。我們淡淡地、自然而然一直走來，不強求也不會放棄。我在想我們會否有另一個 50 年。」
不過琳琳姐就笑指唔要太長命：「第二世吧，不過第二世你會揀第二個！」John哥即鬼馬咁話：「第二世我要做你，報仇咁報，但大家都要一齊。」

John哥話盼下世都同琳琳姐喺埋一齊。
訪問尾聲，琳琳姐坦言要多謝John哥對自己嘅包容，即刻有時會唔開心，但都好快會忘記，唔似自己咁計較，而John哥就笑呵呵表示：「你現在也沒有那麼計較。我們應該感恩，大家終於成功互相忍讓了。」