直播精華｜TVB賽馬日第七屆舉行 藝人歌手獻藝與眾同樂

今年已經係第7屆嘅TVB賽馬日，喺沙田馬場盛大舉行，TVB同香港賽馬會嘅管理層仲有一眾藝人歌手一齊參與，整日除咗11場以唔同節目命名嘅各項賽事之外，各位盛裝現身嘅藝人同歌手都有與現場馬迷同樂玩遊戲，而大家高興嘅就一定係見到 胡楓 同 廖家爵 兩位財神於現場為十家送旺氣喇。

大批藝員同歌手齊齊入場參與TVB賽馬日
整日節目由 姚焯菲 林智樂 同 鍾柔美 嘅歌聲掀起序幕，之後電視廣播有限公司行政主席 許濤 聯同馬會行政總裁 應家柏同一眾高層人員，一齊宣佈今年嘅TVB賽馬日正式啟動。
電視廣播有限公司行政主席 許濤 聯同馬會行政總裁 應家柏同一眾高層人員為呢日活動掀起序幕

呢日到場嘅藝人，分別於公眾席、沙圈等場地同馬迷見面互動，亦參與頒獎儀式。而《中年好聲音2》成員組成嘅女團MISSY、仲有亞洲超星團嘅丁子朗、冼靖峰、黃奕斌、黃星焯同文佐匡亦先後為大家演出歌舞，令氣氛更為熱烈。
丁子朗、冼靖峰、黃奕斌、黃星焯同文佐匡於現場表演

而 陳展鵬 同 林夏薇 仲負責頒發最佳馬匹外觀獎。整日重頭戲一定係第8場嘅TVB盃賽事，最後由霍宏聲策騎嘅幸運有您奪冠，許濤主席等高層亦同兩位總經理 曾志偉 蕭世和 同阿姐 汪明荃 以及4位應屆港姐一齊頒獎予冠軍馬主同騎師。而一眾呢日出席嘅藝人歌手同事，之後亦全體拍攝大合照，氣氛極之熱鬧。

TVB盃由「幸運有您」從後居上力壓其他馬匹獲得