蔡頌思參選「國際潛水小姐」 為保育海洋受傷留長疤

蔡頌思（Jocelyn）早前參選「國際潛水小姐大賽」，比賽有別於坊間一般選美賽事，主要考核選手潛水能力及對海洋嘅認知，大會亦會安排選手潛落海執拾垃圾，藉以推廣環保理念選出海洋大使。

Jocelyn早前參與國際潛水小姐大賽

而身為香港「美人魚」代表嘅Jocelyn，就喺二十幾個國家嘅選手中突圍而出，殺入十強。 Jocelyn自細對海洋深感興趣，所以喺完成美人魚訓練後，Jocelyn亦喺近兩年始參加潛水班，佢曾經試過潛入20米水深，被海底世界嘅壯麗景色所驚艷。相比化身美人魚時零裝備潛水，全副裝備潛水對Jocelyn而言真係「無難度」！ 

佢仲喺廿多個國家嘅選手中躋身十強

不過Jocelyn喺今次比賽亦發生咗小意外！佢不慎被珊瑚𠝹損手臂而血流如注，加上因為拍攝關係而冇認真處理傷口，至今仍留下長達3cm疤痕。但樂觀嘅Jocelyn就笑言，呢道疤可以當做選美嘅「紀念品」，自己不會在意。 

期間仲被珊瑚割傷，留有幾cm長嘅疤痕

而喺呢次賽事，Jocelyn亦遇上同樣身形嬌小、有美人魚經驗嘅印尼選手，二人一拍即合！Jocelyn最難忘係比賽過程期間幾乎每日潛水，每次50分鐘，一日潛足三小時，真係好考體力：「每次潛水後，又要趕上岸極速吹乾頭髮及化妝拍宣傳片，對體能真係好大挑戰。」由於潛水需要體力，所以今次「選美」可謂一反常態，大會鼓勵選手進食增加能量，令Jocelyn可以放心大飲大食。

認識新朋友之餘，Joycelyn指最重要係推廣保育海洋嘅意識