清華高才生20歲歌手詩琳急病離世 韓女星金賽綸寓所倒斃年僅24

內地同韓國同一日接連傳出年輕藝人離世消息，令人震驚。上月底先參與過中央電視台春晚演出，近年於內地發展嘅烏茲別克歌手詩琳(Shirin Abdullaeva)，星期日被指已因病離世，終年僅得20歲。

於內地發展嘅烏茲別克歌手詩琳驚傳離世

佢新年先參與央視嘅春晚演出
正於清華大學就讀嘅詩琳能操4國語言，佢嘅死訊由內地經理人發佈，指詩琳因突發疾病，搶救多日後於2月15號不治，不過未公佈死因，而有外媒就指佢疑感染腦膜炎。
詩林仲係清華學生，更可以流利操四國語言

另外，韓國女藝人 金賽綸 ，星期日被發現倒斃寓所，終年24歲。童星時期已出道嘅 金賽綸，曾同金裕貞同金所炫被封為「三金」，前途一片光明，不過佢2022年因醉駕而形象受損，人氣大跌。直至去年3月突然貼出同舊公司老闆金秀賢嘅貼面合照後秒刪，當時被認為係想靠炒作人氣而東山再起，年底一度聲言今年即將復出，當地警方以尊重死者同家人為由，未有公佈死因。

金賽綸周日被發現倒斃寓所

佢年前因為醉駕令星途大受影響，原定今年就會復出