雷深如暫別歌手身份演唱會告退 憶12年崎嶇音樂路隨時出歌再鬧過

出道12年嘅 雷深如 早前宣佈將暫別歌手身份轉戰幕後，日前佢舉行《J.Atriarchy》音樂會狀態大勇兼全場爆滿， 蔡卓妍  小肥等好友更親身捧場。化身女皇嘅J.Arie由號角手引領入場，之後同Lolly Talk嘅 Sinnie 合唱《一把火》揭開演出序幕，之後新聞多多嘅 林作 亦現身舞台演出，女友同裕美仲有新聞人物五索鍾睿心亦有入場。觀眾興起時全場一齊又唱又跳，氣氛high爆。

J.Arie邀請林作演出，女友裕美同自認為小三嘅五索都有出現
到以「金錢-依附」為主題嘅部份，多位男舞者爆肌熱舞，舞姿大膽。之後J.Arie換上白婚紗，戴上皇冠唱出《一人之下》，再自彈自唱《至少做一件離譜的事》，及後再獻唱《我錯》、《你死我活》等經典慢歌。
J.Arie入行12年，宣佈將暫別歌手身份

之後佢換上紅色厘士連身裙加長靴唱出《陰陽道具》同為其他歌手創作嘅歌曲，與男Dancer火辣共舞，意識大膽。之後唱到自己填詞嘅《遺下來的》時落淚，又表示呢首新歌將派台：「舊年生死跟我好接近，除咗家人離開，去年中我頻臨懸崖邊緣，歌名本叫《遺下來的書》。」又提到邀請林作Rap嘅原因：「佢好代表到角色同社會嘅荒謬，佢本身個人都好荒謬，社會又荒謬。」
阿Sa亦有到場欣賞J.Arie演出

J.Arie喺Encore環節邀請十多位小朋友合唱初入行歌曲《第一志願》，回首入行12年嘅佢話：「呢12年好難行，新人第一年有新鮮感，但之後點維持自己音樂路，繼續翻炒定試新嘢？行到12年唔簡單。」
回想入行嘅發展，令佢非常感觸

之後佢花足半小時感謝幫助過自己嘅工作人員、契爺同父母，仲有支持足足12年嘅fans；亦罕有提到另一半：「佢好宅心仁厚，心照啦！有咩之後再講。」而提到去年離世嘅契爺時，佢哽咽話：「契爺話叫我繼續勤力，希望而家同佢太太一齊開心。去年年中我以為自己冇事，當時情緒崩潰，癱瘓咗三個月，做唔到嘢，每日瞓醒就不自覺流淚，爆出好多問題，我將心聲寫晒入歌，而家冇事喇。」
今次開騷亦同步推出新專輯

佢最後各觀眾訴心聲話：「世界好多荒謬好多殘酷，好多無奈，我好驚自己有一日會冇咗團火。希望你哋日後再見到我，我依然係一個有棱角嘅人，唔會被俗世磨到好圓滑。我唔會消失嘅，希望有幸可以再參與其他歌手嘅歌。如果我突然受衝擊，例如生咗個仔，又或者有嘢未鬧完，想繼續批判嘅話就會到時出歌，希望大家有緣再見。」

又提到希望繼續保持心中嘅批判之火