亞洲電影大獎下月戲曲中心頒獎 木村光希來港領亞洲飛躍演員獎

《第18屆亞洲電影大獎頒獎典禮》3月16號就會喺香港舉行，大會率先公布今屆嘅亞洲飛躍演員獎(AFA Rising Star Award)，將頒予日本星二代木村光希(Kōki)，下月佢亦會親身來港接受獎項。

光希對獲頒呢個大獎心情非常興奮，佢話：「能夠在日本以外的舞台上獲得飛躍演員獎，對我來說意義重大。衷心感謝亞洲電影大獎以及評審的認可，這份肯定讓我更有信心，在未來我會繼續努力，創作出更多精彩的作品。」
木村光希將獲頒發今屆亞洲電影大獎嘅亞洲飛躍演員獎

過往嘅亞洲飛躍演員獎，曾分別頒予目前已成璀璨巨星嘅唔同藝人，好似內地女星 林允 、韓國型男朴敘俊 ，以及去年得獎嘅泰國男神 Win Metawin 等，主辦機構指光希嘅得獎可謂實至名歸，未來可期。

光希唔止係萬人迷 木村拓哉 同歌后 工藤靜香 千金，佢自7歲起就展露出音樂才華，小小年紀就便為母親同三浦大知創作多首流行樂曲。直至15歲她登上《ELLE JAPAN》封面，成為時尚界焦點，仲化身國際知名品牌形象大使。
光希盡得父母嘅演藝DNA，自細參與音樂創作，近年更涉足演員之路

雖然以模特兒身份出道，不過光希近年亦有參與唔少演出，佢話：「拍攝過程中，父親經常給予我支持和鼓勵。尤其是在海外拍攝電影時，我會打電話請教他，很慶幸他與我從事同樣的工作，能理解我作為演員的經歷和感受，讓我感到很安心和踏實。」

佢自2022年正式踏足影壇，喺恐怖電影《牛首村》中就一人分飾兩角，成功駕馭截然不同角色，更獲得日本藍絲帶新人獎。 隨後主演日本與冰島合拍電影《心動50年》(Touch)，當中跨越時間、地域嘅淒美愛情成功打動觀眾。
近年先後參與日本同外地電影演出，角色俱有不俗發揮

最近佢又參與主演英國電影《Tornado》，故事講述身為18世紀布袋戲賣藝少女，逃離黑幫追殺中展開嘅驚險旅程。今次仲係佢首次挑戰武打戲份。新作更係格拉斯哥電影節開幕電影。 

另外改編自同名韓國人氣漫畫；佢主演嘅日本電影《女神降臨》亦快將上映，光希飾演自小就因外貌而自卑，又被周圍排擠嘅「醜小鴨」高中生。
改編自韓漫《女神降臨》嘅新作即將推出

《第18屆亞洲電影大獎頒獎典禮》TVB Plus（82台）獨家電視轉播