「聶風」鄭伊健驚喜現身《風雲》舞劇 旦哥再扮「文丑丑」一秒重回港漫世界

一代本土經典漫畫《風雲》今年35周年，除咗早年嘅電影化成為流傳大作之外， 香港舞蹈團 亦第三度重演《風雲》舞劇，鄭伊健相隔逾十年再以古裝亮相，一身「聶風」造型驚喜現身，更演唱插曲《一對對》，而「文丑丑」鄭丹瑞就擔任舞劇說書人，開場讀白時以手指於眉心畫上一道白色，再配以「文丑丑」招牌笑聲，帶觀眾一秒重返《風雲》故事。

伊健現身《風雲》舞劇重演嘅首場演出，仲獻唱電影經典插曲《一對對》
日前於戲曲中心大劇院嘅五場演出圓滿結束。其中首場演出更為「港漫武俠舞劇《風雲》慈善場」，扣除票價以外所有收益，捐款支持「香港舞蹈團學生票資助計劃」，推動香港舞蹈藝術教育。
旦哥就以文丑丑身份擔任說書人角色

當年曾參與電影《風雲：雄霸天下》嘅「聶風」鄭伊健同「文丑丑」鄭丹瑞，以及電影配樂、主題曲《風雲》同插曲《一對對》作曲人陳光榮，仲有《風雲》漫畫原作靈魂人物 馬榮成 出席。佢哋亦聯同演出嘅一眾舞者謝幕。
原著馬榮成、電影音樂創作陳光榮亦有現身，同一眾舞者齊齊謝幕

旦哥指：「我願意嚟做呢件事，係因為識於微時嘅馬榮成叫到，另一個原因係『香港舞蹈團』係我哋香港嘅驕傲，我能夠有機會踏上呢個舞台同香港舞蹈團一齊，雖然我冇跳過一步，但我已經覺得好爽！」
旦哥盛讚舞蹈團嘅演出

伊健亦都話：「我好榮幸可以同香港舞蹈團一齊合作，仲有馬榮成，由《風雲》電影我有份演出，到依家我都有份參與！」而創作出《風雲》主題經典歌曲音樂嘅陳光榮就指：「我都好榮幸能夠成為《風雲》嘅一份子，有份寫歌，多謝晒大家！」
伊健當年扮演聶風，同城城嘅步驚雲激鬥

至於《風雲》主腦馬榮成，亦表達感謝：「我想多謝香港舞蹈團，我寫漫畫，冇諗過可以喺舞蹈展現我嘅作品，好多謝佢哋咁大嘅創作力！」

當年扮演聶風同文丑丑深入民心嘅伊健同旦哥之後接受訪問，旦哥笑言：「今日我哋為咗《風雲》舞劇而嚟，我表演跳舞，你就做返老本行唱歌，哈哈！《風雲》35年嘅經典，用我嘅聲音去講畀大家聽，我覺得好值得做。我曾經同好多團體合作過，就係未同過香港舞蹈團合作。」
5場演出完滿落幕

8年前已曾欣賞過《風雲》舞劇嘅伊健亦話：「呢個係香港嘅產業，咁多年之後仲有，既然佢哋邀請我哋，一定會出現。」旦哥就指：「香港舞蹈團Crossover港漫，係好值得我哋參與嘅事，好多謝佢哋邀請我哋，希望下一次邀請我真係跳舞啦！」