泳兒邀小塵埃作新歌送驚喜報答 蝦碌百出幾乎穿煲幸最終成功

泳兒 過去幾年嘅專攻暗黑系列作品，而最近推出嘅新作《無糖可樂》，就邀請情侶組合「小塵埃」合作，以純粹平實嘅愛情小品同大家見面。

為宣傳歌曲，早前Vincy為好友江若琳製造驚喜予老公Oscar，亦約埋為《無糖可樂》作曲嘅「小塵埃」Jonathan，為拍拖已13年嘅女友「小塵埃」女主音Pollie製造驚喜。Vincy仲提早向Joanthan收集Pollie喜好資料，得知Pollie喜歡貓仔狗仔後就提議去寵物cafe，Vincy仲靈機一觸整Jonathan一比一攬枕作禮物。
Vincy提議安排呢個一比一攬枕作為禮物

Vincy同Jonathan當日先去花墟買花，之後就到酒店佈置，Jonathan嘅一比一攬枕亦「出場」，仲「瞓」喺大床靜候Pollie來臨。
Vincy同Jonathan先去買花，為拍拖多年嘅Pollie準備驚喜

Pollie之後準時現身貓Cafe，更直指拍拖以來都唔會特別慶祝特別日子，平時拍拖仲多都都係同朋友一齊玩。Vincy之後假意稱拍攝完成，訛稱「兜」兩人到尖沙咀，到達酒店後又帶佢哋行秘道，其實係驚喜帶Pollie到早早準備好嘅房間，一臉懵懂嘅Pollie先如夢初醒，Vincy指知道呢對情侶從未去過staycation同甜蜜兩人旅行，所以特別安排：「希望留個難忘嘅情人節俾你哋。」

而Pollie見到床上嘅「半裸猛男Jonathan」，雖閃過嫌棄表情，不過仍飛撲攬實兼大笑話：「有少少唔想拎番屋企。」而Jonathan亦送上寫滿愛意嘅心意卡，令呢次驚喜非常成功。
雖然Pollie嫌棄攬枕中Jonathan嘅形象，不過仍然非常開心

不過當中發生唔少蝦碌事令驚喜幾乎穿煲，Vincy話：「今次準備咗兩個驚喜，第一個係睇貓，但我覺得睇貓好似冇乜特別，第二個驚喜就係安排佢哋staycation。但係喺第一個location嘅時候，我哋唔覺意爆響口，因為我哋講『我哋第一個地方⋯⋯』即係代表仲有第二個地方啦，哈哈。」
事後Vincy仲話幾乎穿煲，好在Pollie未有發現

Vincy仲話：「第二個蝦碌位係我哋呃Pollie去第二個地方話兜埋佢去攞車，其實係呃佢上酒店房，但係我哋唔記得咗我哋將間酒店房咭俾咗同事，因為佢要先上房set cam，所以我哋去到樓下就搭唔到lift上房，喺嗰度糾纏咗一陣，講大話要搵路、又話急尿去廁所，但我哋兩個都唔係好識講大話，哈哈。所以呢個驚喜最難就係講大話。」