沈震軒撈過界做Uber司機被公開？ 網友期待同超索女友陳欣妍一齊坐

好多時藝人入不敷支都會低調秘撈，近日網上就流傳沈震軒Sammy出動私火戰車BMW ix做Uber司機，仲真係有乘客坐過佢車，將當中嘅資料截圖上網分享，喺司機個人資訊一欄上，顯示嘅名字係HO MING，駕駛Uber有兩個月，暫時有107個行程，獲得4.96超高評分，而且頭像都係沈震軒個樣，加上沈震軒原名叫沈浩明，身份不謀而合。到底屬真假本尊就未有親自回應，但肯定嘅就係令佢嘅粉絲同網友好開心，仲議論紛紛。
網上流傳沈震軒揸Uber評分仲好高添！
識睇就梗係要睇留言啦，呢個截圖流傳後，引嚟網民雀躍嘅反應，有網友言之鑿鑿話架車真係沈震軒，因為見佢喺IG Post過去收車嘅相。又問係咪「蘭桂芳USB」、又話PO圖者喺Call車界好出名，專程車人上深圳嘅中港牌「深圳軒」、「真係佢？要瘋狂叫車」、又有人要求想同沈震軒嘅超索女友陳欣妍一齊坐、搭佢車要試吓點唱等嘅留言。亦有人話有朋友Call過佢車，因為有部戲要做的士司機，所以想攞經驗。
沈震軒
現年41歲嘅沈震軒現為英皇娛樂旗下藝人，分別喺娛樂圈及商界發展，涉及歌影視範疇，早前更開live唱歌，熱愛健身操肌嘅佢早年又同女友情侶檔合資開設星級健身中心，男嘅一身爆肌，女嘅擁有fit爆身材做生招牌，近年健身行業大受歡迎，因此估計佢哋嘅收入應該唔成問題。
網民留言話想同沈震軒女友陳欣妍一齊搭Uber。