胡杏兒性感亮相米蘭時裝周 為品牌新裝整月火速瘦身

上星期先為好姊妹李施嬅慶祝完生日嘅 胡杏兒 ，近日應兩個時尚品牌邀請，再次到訪米蘭出席時裝週，出發前杏兒已經預告會去一個「老地方睇靚衫」，而此行佢亦披上品牌最新系列出席，之前仲提早減肥瘦身，難怪此行Fit到爆啦。

杏兒近日應兩個品牌邀請出席米蘭時裝周
去年拍罷三部新劇嘅杏兒忙足成年，今次獲品牌邀請擔任座上客，雖然係難得出埠嘅機會，不過身在米蘭嘅杏兒就話：「其中一個品牌嘅服裝要駕馭真係考起我；因為大褸裏面係一件好性感嘅bra-top，而且仲露腰。新年期間放縱自己食咗好多嘢，所以都擔心自起程之前可唔可以成功修身？好在經過努力運動之下總算過關！」
新年後更一直為性感新裝努力Keep Fit

其實今次活動杏兒只需現身半小時；不過就花成個月瘦身，呢日正式披上大褸，性感現身嘅佢更係氣質出眾，不時被投以艷羨目光，難以相信佢已經係三子之母。
喺當地影低唔少靚相嘅佢，對冇時間Shopping大表可惜

難得到訪當地嘅杏兒，被問到會否趁機Shopping獎勵自己時，就非常可惜咁話：「雖然好想趁機shopping，不過連走兩個時裝騷確實有啲匆忙，而且又要為新工作準備，唯有下次再獎勵自己啦。不過攝影師喺街頭為我拍攝時，寒風下陽光普照，好享受呢種感覺，別有一番米蘭風味。」

仲話要留返下次到訪時好好再享受咁話