韓星徐康俊退伍新劇化身高中臥底 坦言世界潮流大變要重新學習

31歲嘅韓劇男神 徐康俊 去年退伍，等咗3年佢嘅新劇終於播出。徐康俊早前同拍檔秦基周、金信祿、金玟周等出席新劇發布會。

徐康俊現身退伍後嘅首部新劇宣傳

呢次退伍後首次宣傳作品，徐康俊表現似乎非常緊張，佢自爆覺得成個世界都唔同咗，好似呢日先發覺原來連擺甫士嘅潮流都唔同晒。劇中佢仲認識到唔少時下嘅潮語令佢長知識，更話同場有唔少真嘅高中生，突然驚覺外型上自己經已差好遠。 
重返演藝圈嘅佢話有唔少需要趕上嘅地方

新劇講飾演特務嘅徐康俊，假扮高中生潛入校園查案，劇情同經典港產片《逃學威龍》不謀而合。作品集合搞笑、動作、燒腦嘅劇情，加上有徐康俊呢個最強Body騷肌場口，相信有一定睇頭。
劇中佢化身臥底潛伏學校當中

而事前徐康俊話有特別為騷肌戲準備，因為入伍時做運動嘅時間好多，自己亦有勤力管理身材，佢仲話拍攝前食咗高熱量嘅炒章魚做午餐添。

故事既有動作又搞笑燒腦