何超率黃貫中廿四味LMF倫敦開騷 陳子聰康復後首踏舞台紅潤健壯

何超 日前同 黃貫中 LMF 廿四味 喺倫敦舉行演唱會，仲獲英國傳媒形容為震撼倫敦，呢晚演出並35首歌曲；超過3個小時，全程絕無冷場，而今次更係 陳子聰 完成手術以來，全面康復後首次亮相，見佢全程一面笑容，更可以見到肚腩仔一面紅光。

佢同廿四味成員齊齊又唱又跳，又向台下觀眾狂拋紀念品，炒熱現場氣氛，唱出經典舞曲《Wonderland》時，更係全場起舞。黃貫中 之後緊接登場，以連場爆炸性電子結他演奏，氣勢磅礡。阿Paul更指：「見到好多熟悉嘅面孔，頭先我哋喺後台都話好似返咗高山(劇場) 咁。」隨後就獻唱經典歌曲《無得比》同《天與地》，更吸引台下歌迷全場大合唱。
阿Paul形容現場氣份猶如早年嘅高山劇場一樣

何超 之後以金髪同一身型格皮褸配皮短裙登場，同Paul合唱 《阿博二世》，令觀眾喜出望外，之後何超同樂隊Josie and the Uni Boys選唱連串高能量爆炸作品，更少有全程又唱又跳。歌曲之間又不時發揮幽默本色，向台下樂迷同歌迷講笑，仲有女Fans大叫：「You are our Queen。」
Josie呢晚獻唱大S為佢填詞嘅《章魚黑洞》悼念

何超呢晚亦獻唱好友大S為佢填詞嘅《章魚黑洞》，又表示要將歌曲獻予大S，令觀眾動容。 佢之後又指要邀請一位好重要嘅人上台，此時陳子聰同廿四味再次登場，眾人合唱《Chilling & Blazin》，Josie同陳子聰更罕有同台合體並舞，結尾時又深情相擁。
陳子聰康復後重返舞台，仲同眾老友齊齊落力演出

唱至《Johnny Depp》時，何超指歌曲係為偶像Johnny Depp創作，大讚佢靚仔又才華洋溢，更大爆當年因怕被對方控告侵權，曾親自寫信同將歌曲成品寄予對方希望得到認同，結果Johnny以書面回覆Good Band兩字。

佢之後介紹公司新人Iman出場，兩人合唱Nat King Cole嘅經典情歌 ，高大嘅Iman原來擁有一把柔情嗓音，仲一齊合跳輕爵士舞步。最後LMF登場同Josie合唱《無根草》，最後以《好女孩》作結。

LMF接管舞台後，令觀眾又再情緒高漲，唱到經典《WTF》時，台上台下情緒同樣高漲，全場同步釋放壓抑情緒。而《冚家令》音樂響起時，佢哋仲話：「希望你哋將所有嘅不滿、憤怒、抱怨一次過發洩哂出嚟。」隨後又同黃貫中合作《大懶堂》，又向英國歌迷問候：「你哋喺英國好嘛？終於可以嚟到英國見大家！」
演唱會尾聲現場播出已故成員大飛(Davy陳匡榮) 嘅聲音，而全體演出成員包括 Josie and the Uni Boys、黃貫中、廿四味同LMF亦上台合唱《一夥》。LMF感觸指歌曲係黃貫中同大飛作品，如今大飛離世，阿Paul決定將歌獻予大飛：「無論你去到邊度，大飛，我哋同你永遠都係一夥。」
呢晚大家一齊向早前離世嘅大飛悼念

唔少當地傳媒都大讚當晚演出，而唔少移居當地港人粉仲專程提早到倫敦，仲表達希望大隊可到其他城市演出，Josie亦指已同主辦單位溝通，希望其後到訪英國其他城市。今次《Dragon Rock》音樂會，由金像導演烈尼史葛(Ridley Scott）旗下製作公司鏝製，完成後期剪輯工作後將於日本播出。

Josie指演出稍後妁公開播放，亦希望到訪唔同城市