張建聲酒後開直播呻無工開搵金主豪飲屙血 爆獲邀富婆泳池派對出場費30萬

近年港產片陷入前所未見嘅寒冬期，不少電影公司難以開拍新戲，業內人士面臨手停口停困境，41歲張建聲因工作量大減，早前醉住開直播大吐苦水，講作為香港演員冇戲拍嘅慘況，為咗尋找投資機會，佢不時出外應酬，更自爆飲酒飲到屙血，可惜都係徒勞無功，爆粗呻「好X攰」，張建聲今日喺IG回應此事，稱嗰日應酬完未醉晒就開直播，有感而發，純粹係講吓電影業同自己嘢咁，又自爆收富婆泳池派對邀請「出場費」30萬！？

41歲張建聲因工作量大減，早前醉住開直播大吐苦水，講作為香港演員冇戲拍嘅慘況。
張建聲喺日前開直播稱香港影視圈「個餅太細」，比佢叻嘅人有好多，所以目前喺香港冇人搵佢拍戲，佢只好去廣州、馬來西亞及日本等地尋求工作機會，當有網民問佢攰唔攰嗰陣，張建聲頓時眼泛淚光，爆粗稱自己「真係好X攰」，為咗搵投資者而四出奔波，應酬時更飲酒飲到屙血、穿胃仍頂硬上，張建聲慨嘆多數只係白飲，張建聲強調講出嚟並唔係賣慘，只係熱愛演戲絕不放棄，望活到老、演到老，希望能博取機會，成功就大家有工開。

張建聲噚日自爆收富婆泳池派對邀請「出場費」30萬！？
張建聲更指自己連體檢都唔敢做，面對眼前嘅困境，張建聲坦言開戲真係好困難，「買層樓都保值過開一部戲」，佢希望觀眾仍支持港產片，多啲入場支持。張建聲凌晨喺IG留言表示：「收到大家留言關心，多謝晒，其實嗰晚應酬完未醉晒咪開live Xup（噏）吓，冇特別，Ok Bye，香港地賣慘無X用㗎，去賣橙重（仲）實際啲。」

張建聲仲爆連TVB體育記者何振然（Elson）都收到呢啲「詐騙」簡訊！

張建聲除咗陷入冇工開嘅艱難時期，仲要不時收到啲疑似詐騙嘅消息，噚日佢分享一個聲稱搵男藝人陪富婆嘅邀請，話泳池派對「出場費」30萬，包食陪游水，張建聲仲爆連TVB體育記者何振然（Elson）都收到呢啲「詐騙」簡訊！

張建聲坦言熱愛演戲絕不放棄，望活到老、演到老，希望能博取機會，成功就大家有工開。