養生之旅丨黎諾懿出埠兩周小春雞不捨爆喊 陳嘉慧獲節目組照顧可中途返港

黎諾懿、文凱婷、陳嘉慧Erica 呢日咁早現身機場，原來係要出發去到雲南為新節目《養生之旅》進行拍攝，為觀眾尋持養生秘訣。

黎諾懿今次同兩位女士出發拍攝新節目
諾懿表示聽聞導演同監製都有高山反應，而家正在休息中，所以自己就打算賴貓，一落機就話自己都有少少高山反應，咁就可以長期休息自己去玩，留返畀啲後生嘅去拍攝，文凱婷聽到諾懿咁講就即刻耍手擰頭，話自己要人Carry；而Erica就話自己未上機就已經開始唞唔到氣。之後諾懿又話出發前曾經開會，監製曾問佢有啲咩唔習慣，點知諾懿就搞笑咁話自己年紀都有返啲歲數，所以早起同遲收工自己都會唔太慣。
結婚生小朋友之後，Erica亦復工參與主持

Erica透露今次拍攝會接觸到好多藥材等養生知識，所以佢話希望學多啲知識返嚟自己養生，而文凱婷就話聽聞養生係闊太生活，而家自己都可以體驗一下。
Aeren話希望體驗闊太式嘅養生生活呀

諾懿同Erica都係有小朋友嘅父母，今次要離開半個月，當然非常之不捨，諾懿就話自己出門口時，囝囝小春雞專登起身送佢，但好快就開始因為唔捨得爸爸而喊。而Erica個囡囡就剛好喺出發前一日度過一歲生日，所以佢都非常之唔捨得，但好在監製相當體諒佢，畀佢拍7日就返香港3日照顧囡囡，然後再返當地拍多7日。