王大陸涉殺人未遂案 對司機怒比中指畫面曝光

台灣男星 王大陸 4號驚傳因殺人未遂再被拘捕，消息傳出後震驚娛樂圈。事源佢上月因為逃避兵役被捕，手機遭到警方扣查，結果警方意外發現王大陸涉及一宗發生於去年嘅傷人案。

王大陸因涉傷人而再惹官非
消息指王大陸去年4月透過網約平台call車，搭車期間同司機發生口角，疑似當時車cam拍低嘅片段亦流出，影片中見到王大陸落車之後表現憤怒，仲對住司機怒比中指，事後王大陸更教唆游姓好朋友向司機報復，游姓男子搵打手打傷司機，期間仲拍片紀錄打人過程，更將片段傳俾王大陸。
事發當日片段亦於網上流出

由於手機中相關證據確鑿，檢方4號行拘捕王大陸同游姓男子，更以涉及殺人未遂調查。檢察官審訊過後改以教唆傷害罪嫌將兩人聲押禁見，並於5號凌晨開庭審理。直至清晨約6點，裁定王大陸需以新台幣500萬保釋。
王大陸昨午獲准以500萬保釋

中午時分王大陸繳交保釋金後步出地檢署，現場大批傳媒一擁而上，場面混亂。而已經有上次經驗嘅王大陸，今次離開時明顯淡定得多，過程中佢頻頻雙手合拾，雖然冇回應傳媒提問，但就不斷提醒大家小心安全。
上月佢先涉嫌逃避兵役被捕，原定13號正式報到服役

王大陸原定今個月13號入伍，對於後續兵役問題，有關單位回應指，由於王大陸已經收到入伍通知，加上佢已經保釋，不構成被羈押條件，所以仍需根據指定嘅時間同地點到向軍隊報到。至於王大陸入伍之後，如果被法院傳召上庭，可以按程序請假出庭應訊。

執法部門原先以殺人未遂罪拘捕佢同涉案嘅姓游朋友