紅豆｜溫情揚溢入圍索諾瑪國際電影節 龔姐代華哥解話並非憎恨Stephy

溫情電影《紅豆》上映個多星期，唔少觀眾都大讚電影拍出濃厚香港情懷，描寫細膩貼地。《紅豆》除咗早前獲2024中美電影節「金天使獎」，又成為2024倫敦東亞電影節閉幕電影之外，近日更入圍第28屆索諾瑪國際電影節，主辦單位讚賞電影以香港傳統糖水舖於城巿規劃下，遭遇生存威脅作背景，又指《紅豆》道出一段關於親情羈絆同愛嘅溫暖故事。

龔慈欣、導演鄒穎同任達華現身謝票場
導演鄒穎同主演任達華、龔慈欣趁三八婦女節到各戲院謝票同觀眾見面，導演指：「多謝各位觀眾支持，我哋《紅豆》入選今屆索諾瑪國際電影節，喺北美嘅觀眾都可以欣賞到充滿香港情懷嘅電影。」華哥就笑言：「甜品有好多，但我覺得紅豆沙應該去得更遠，去世界各地更多地方，等大家欣賞美食之外，亦都欣賞到呢部充滿感情嘅電影。」龔慈欣就話：「大家都覺得好溫馨，希望大家多多支持《紅豆》。」
龔姐仲為片中嘅丈夫任達華解畫

有現場觀眾問任達華，點解喺戲中同扮演佢女兒嘅Stephy咁大仇口？龔慈欣就回應話：「佢只係大男人，唔係大仇口。」任達華就話：「潮州籍男人好顧家庭，但是幾大男人，是傳統重男輕女，辛苦媽媽喇，如果生第一個係女，辛苦喇，第二個係女，辛苦喇，第三都係女，辛苦喇﹗因為以前家庭要工作，屋企都希望有個男仔幫到手，佢哋24小時不停工作，不停照顧家庭，只係唔識用口講出愛意。」
盧慧敏亦有參與謝票行列

盧慧敏 亦同導演結伴謝票，現場觀眾唔止讚電影劇本好，亦有觀眾大讚Amy將空姐角色演繹出色，令觀眾留低好印象。