歌手助陣青少年街頭音樂表演訓練 盧巧音任壓軸嘉賓下月再開騷

第二屆「青少年街頭音樂表演擴展計劃」終期匯演，日前舉行。除咗由兩屆學員表演外，大會亦邀請多位實力歌手好似 陳健安 糖妹 吳林峰 獻唱同分享歌手之路，而四月將再舉行個唱嘅盧巧音 就以特別嘉賓身份壓軸登場。

第二屆青少年街頭音樂表演擴展計劃，有幾位歌手參與指導年青朋友
安仔呢晚打頭陣獻唱《戀愛腦之死》，去年曾於同一場地開騷嘅佢，勉勵一眾學員話：「有時會遇到好多問題令喜愛嘅音樂被磨蝕，但唱歌嘅目的係令自己開心，唔好諗會從中得到乜嘢，只要唱歌時得到最爽嘅感覺就夠。」
安仔話參與呢次計畫，令佢回憶起當年C Allstar嘅街頭演出

活動鼓勵青少年投入街頭音樂表演，安仔就直言回憶起C AllStar早年間連續14個周末喺街頭表演嘅往事：「呢段經歷係一個好重要嘅試煉場，好多事都會隨機發生，亦會有人突然想挑戰即席點唱、好多點滴，要著重自己心態，諗點樣令自己進步同變強。」

身兼評審同導師身份嘅吳林峰，就大讚學員質素高：「創作同唱歌方面都好高質，令我感受到佢哋嘅熱誠，佢哋教返識我Passion係唔關年齡事。佢哋對音樂嘅想法都好新鮮。」佢又指完成音樂會後，將同女朋友外遊充電：「上次放假已經係1、2年前，所以完成音樂會就放自己一星期假，到郊區深山遊，感受大自然靈氣同慢活一下。」
吳林峰既係評審亦係導師，仲話同青少年合作令佢都熱血起嚟

連續兩屆擔任導師嘅糖妹就指計畫非常好玩：「之前同學員一齊busking，他們會唱糖兄妹嘅歌，最終同一首歌唱足兩次，佢哋好識尊重老師，所以就揀唱我哋嘅歌，反而我笑言想試唱人哋嘅歌 。見佢哋著校服跑嚟上堂嘅片段，令我回憶當年自己夾band嘅情景。」
糖妹已連續兩屆擔任計畫導師

壓軸特別嘉賓Candy一口氣連唱《垃圾》同《好心分手》兩首經典名曲，原來亦曾同部份學員Busking：「佢哋嘅熱情分享到一啲青春俾我，佢哋一啲都唔緊張，感覺好勇敢，亦識得把握每一個機會，真係好難得。呢個年代做歌手或音樂人一啲都唔容易，不過仍然勇敢踏出呢一步，所以值得好好幫助。」
特別嘉賓盧巧音連唱兩首金曲，下月佢亦會再次開騷

下月就會於同一場館開騷嘅Candy，又笑言趁呢次機會率先踩場：「其實踏足舞台都好開心，尤其係呢個舞台有種特別感覺，因為3年前我都係喺呢度舉行音樂會。不過呢次未必趕得切造新歌，可能會唱一啲以往比較少唱嘅舊歌，rundown仲係構思中，希望會有一個精彩嘅歌曲次序，令觀眾有深刻嘅感覺。」