姜大衞李力持護老院探秦煌 住單人房三餐溫飽滿意現狀

資深演員秦煌上個月中迎來80大壽。日前佢嘅老友姜大衞同導演李力持就親自去護老院探秦煌，李力持仲拍片擺上社交平台，片中見到秦煌精神不俗，仲對住鏡頭同大家打招呼。

姜大衞同導演李力持日前去探望秦煌。
喺李力持post出嘅片同相中，秦煌著上灰色衛衣，睇落相當精神，仲識得對鏡頭談笑風生，李力持喺post中寫到，「同姜大衛去土瓜灣老人院探望剛過80大壽的秦煌，老人院很乾淨，有人陪也可以落樓下買下嘢，老頑童精神好好，反應好快，無比人蝦，亦都無蝦人，瞓得食得，佢話多謝大家關心」
李力持PO出秦煌近照。
秦煌近況曝光後，唔少網民都留言讚佢「好精神！好醒目！」、「一定要身體健康」、「周伯通心態好樂觀」、「見到佢現狀面色好好真開心」、「老頑童精神唔錯」等等。亦有人稱讚李力持同姜大衞好有心，話佢地嘅出現一定令秦煌好開心。
秦煌精神唔錯。
秦煌上年因為兩次跌倒，行動不便，先後轉過四次醫院，最後入住護老院先得到妥善照顧。上個月80大壽，雖然仔女冇去探望，不過就有傳媒去護老院探望佢，而佢都有提到喺護老院嘅生活，除咗三餐溫飽，有單人房住，仲有4千幾蚊綜援金做零用錢，睇來對護老院生活都幾滿意。
John哥同老友聚舊。秦煌同李力持合照。