友乜唔講得丨鄧兆尊「后宮」按年付家用 3C女友兵團生活費好夠用

鄧兆尊一向出名艷福無邊，「后宮」除咗Carmen同Cherry之外，仲有新歡陳妙慧（Nana），同時擁有3位女友一直係城中熱話，由於3位女友各有居所，兆尊都要化身「時間管理大師」，抽時間伴「3C女友兵團」，兆尊與好友陳彥行喺近排播出嗰集《友乜唔講得》，講起「3C女友兵團」每月家用畀幾多，兆尊大爆係按年結去畀錢。

兆尊與好友陳彥行喺近排播出嗰集《友乜唔講得》，講起「3C女友兵團」每月家用畀幾多。
主持梅小惠問有冇六位數字，兆尊冇透露實際金額，只係一年畀一次家用，話最好係年結一次過畀，用完先再問佢拎，另一主持江欣燕好奇問係唔係真係用到一年，兆尊就話：「係用到嘅，要求太多，可以去勞工處，就唔好嚟搵我，係講太揮霍嗰種人。」

鄧兆尊曾同「三奶」陳小姐亮相《直播靈接觸》。
被問最貴嘅一房係畀幾多錢，兆尊透露每位女友家用都一樣，佢解釋自己唔係真係咁多錢，只係畀基本開支，夠用就得，好友陳彥行即追問「3C女友兵團」可唔可以買名牌包包，兆尊話偶然可以，笑指女友冇咁蠢用啲家用錢去買，言下之意就係捉兆尊去買啦，全場即忍唔住大笑！

鄧兆尊享齊人之福，有「正印」Carmen、「阿二」車厘子（Cherry） 。