中年好聲音3丨陳芷盈於偶像陳曉東前獻唱 劉曉昆首度挑戰唱跳廣東歌

《中年好聲音3》將於16號晚播出16強晉級14強「偶像之歌」一對一淘汰賽上半場賽事，陳曉東再度回歸任嘉賓評審，參賽者要挑戰一首偶像嘅金曲出戰，剛好陳芷盈嘅偶像就係東東，佢揀選咗東東嘅《心有獨鍾》獻唱，表現更獲偶像大讚。
陳芷盈
東東話評分準則係想聽到參賽者唱出自己嘅版本同靈魂，佢形容芷盈唱出少女版。能夠喺偶象前獻唱，芷盈都話好似夢想成真，東東仲話有機會一齊同台合唱。
陳曉東再任評判。
今個回合，各位參賽者按上回分數分成上、下弦，然後上弦參賽者出場前任意挑選下弦參賽者挑戰，之後再換轉挑選方法。撥入下弦參賽者嘅劉曉昆反而揀選跳唱快歌出戰，佢解釋因為唔再唱跳就無乜機會，因為佢好想留一個唱跳畫面於中聲舞台，更為咗歌曲苦練廣東歌，佢笑指舌頭都咬爛。
劉曉昆苦練廣東快歌。
而任永健經常被評審批評拍子唔準，但原來佢每次上舞台的壓力，比大家想像中更多，因為以往無人教授過唱歌，一直以感情行先不理拍子，但上台出戰就變成最大嘅壓力。
任永健指每次上舞台都好大壓力。