何超儀80年代Disco風個唱 獲搖滾班霸U2鼓手送花籃

何超儀早前重拾歌手何超身份，喺九展舉行一連兩場《Flash Back Now party》演唱會，唔少圈中人好似謝霆鋒、陳冠希、林敏聰、草蜢、楊千嬅等都有送上花籃，當中最特別嘅花籃，就要數世界搖滾班霸U2嘅鼓手Larry Mullen越洋送嚟嘅花籃，據知Larry Mullen為咗個花籃可以準時喺開騷前送到，佢仲叫花店預早一日幾花籃送到會場，認真貼心。

演唱會大玩80年代Disco風，為咗重現當年Disco嘅黃金時代，何超除咗將逾90個閃波掛喺舞台上，營造Disco嘅感覺外，又請嚟昔日Disco界四大DJ之一嘅Chris Lee打碟暖場，搞到演唱會未正式開始，啲樂迷已經企晒起身跳舞。

演唱會上，何超同一眾嘉賓Eric Kwok、布志倫、葉佩雯、廿四味、林二汶等唱盡風靡80年代嘅外國歌曲，令全場氣氛High爆，之後何超又同老公陳子聰合體唱出Prince嘅《When Doves cry》，兩公婆首度同台合唱，令台下觀眾尖叫聲不絕。

完場後，唔少樂迷喺場外等候何超，對於大家要求合照同簽名，何超一一答應外，仲同歌迷逐個講多謝呀！