傳錢慧儀馬清揚正辦離婚 雙方回應各自表述關係成謎

前香港小姐亞軍錢慧儀，1995年同大生銀行家族後人馬青揚結婚，婚後育有3名子女，一直非常恩愛。不過有雜誌報道，指近年社交界一直有傳二人婚姻關係亮起紅燈，更指兩人嘅離婚申請12月會喺家事法庭仲裁。

報道指，18年開始就有傳馬錢兩人之間關係開始出現問題，當中仲有一位鳥克蘭藉模特兒介入，而錢慧儀仲被指曾被要求搬離主人房，遷往一無窗房間瞓足9個月摺床。

不過馬青揚接受查詢時，就否認離婚消息，仲反問記者「點解要離婚」，但係女事主錢慧儀就一反常態，向記者稱「唔好再叫我馬太」，仲正式發聲明宣佈準備離婚。聲明簡短指：「痛了，累了，心碎了！」這首歌正好代表我過去四年來的心情。今天，我決定重新出發，向一段逝去的愛情及27年的婚姻正式告別。請，以後不要再叫我馬太。

錢慧儀近年逐漸減少喺社交圈子活動，而佢多年嚟同家人之間嘅新聞都備受注目，1998年，佢嘅爸爸曾喺馬家寓所外下跪，為求取回150萬物業首期，事件成為新聞熱話。事件因為90年代初錢家一齊購入物業而起，據指一直由錢慧儀負責供款，不過後來就因為賣樓分錢討論不果而鬧翻。後來物業因斷供被銀行收回，錢慧儀更一度被入稟申請破產。事後佢就指係因為父母貪財而令關係破裂。

到2000年代，錢慧儀嘅細佬錢俊雄因服藥過量離世，事件再令佢同父母關係陷入冰河時期，自始佢同父母亦斷絕關係。到2009年4月，錢母尋短離世，錢慧儀同丈夫為母辦理後事，亦安排母親同細佬合葬，而佢同父親之間嘅惡劣關係，亦被傳媒形容有回暖變好跡象。