《聲夢2》五強靠戰衣率先曝光 設計師教提升自信穿搭秘技

「傳奇新星」將喺10月2號舉行《聲夢傳奇2》總決賽誕生，大會形象總監陳灝而（Janae Chan）邀請多位本地設計師為參賽者打造戰衣，一眾設計師喺造衫前先跟學員溝通，希望戰衣配合佢哋演出，同時亦為學員增添信心，整裝待發！

一向怕醜嘅Sabrina趙紫諾，要求一件有安全感嘅晚裝，時裝師Vincy Wong指今次整一個入膊設計嘅粉藍色可愛連身裙，散出少女感覺，Vincy Wong表示仍有啲特別嘅感演，所以佢喺背面設計一個大蝴蝶結、微微sexy嘅大露背，而裙係前短後長，因為Sabrina係長腿小姐，覺得該款式好適合Sabrina晒美腿。

另一設計師Otto Tang為女子組合XiX設計一系列粉紅色戰衣，為咗女團整體感覺，設計師喺戰衣上加咗唔少細節，用一啲水波形設計，令感覺有活力得嚟又唔會好成熟，始終年齡層係14至15歲之間，譬如Kiele鄧曉殷跳開芭蕾舞，設計師便加入一啲元素喺佢件戰衣；Charlotte繆昀希喺六個女仔當中，身形比較瘦削，所以佢件戰衣用兩層layer、帶少少娃娃形上身，希望拉闊啲個人；Vici莊殷玥本身比較高，戰衣係後面布拉長少少嘅背心款，配一條短褲，令感覺唔會喺六個女仔之中，有一個人特別高出嚟。

形象總監幫Pamela趙小婷揀咗一條仙氣連身裙，帶出Pamela嘅文青氣質，當中更選咗Pamela最愛嘅藍色，佢搵咗一個廿幾歲嘅設計師，戰衣巧妙地用指甲油做前面顏色圖案，而件衫故事係講緊一位仙子，設計師話前面嘅設計係仙子嘅一對翼，好想有透光感，整體感覺好magic，形象總監認為呢件戰衣可以畀Pamela好大嘅信心，形象總監表示：「Pamela起初擔心件衫carry唔到，覺得自己細粒，著完佢都好開心，覺得自己好有童話式嘅感覺。」

精於打造精品晚裝嘅設計師Andy Ho，分別為Jasmine任暟晴同Janees黃洛妍整咗兩件風格唔同嘅禮服，設計師Andy指Jasmine係代表茉莉花，今次參賽歌曲亦同花有關，所以Andy喺晚裝上用立體裁剪方法，再加上特別處理過嘅棉，比較挺身及輕身，整出一片片花瓣感覺，最尾加咗一啲奧地利嘅水晶，感覺似「露水」，立體裁剪最大難度係每一郁一剪，容易影響到整體效果，設計師Andy表示：「有時幾個鐘得，有時十幾日都未整完，喺困難喺度！」

而Janees黃洛妍嘅晚裝，設計師Andy希望整一款有歐陸感覺，設計師Andy表示第一次接觸Janees係俾佢啲膚色吸引到，感覺好似歐洲女士，我就揀咗法國Lace做上衣，加鴕鳥毛做點綴，下身係懷舊嘅雀仔印花布。」設計師Andy呢件衫曾去芝加哥當代藝術博物館展售，而雀仔印花裙曾刊登北歐一本雜誌。

大會形象總監Janae接觸學員時間最多，整個過程見證學員成長及進步，Janees同Sabrina最大改變，形象總監指Janees好努力減肥，同埋敢於嘗試，回想第一次見《聲夢２》，第一個係見Sabrina，當時Sabrina覺得自己唔夠靚，後尾同Sabrina慢慢解釋，陪Sabrina行街買衫，等佢慢慢可以駕馭好多衫。