MC鼓勵跪地中學男繼續唱歌 洪嘉豪望公司會有老年組廣告

Dear Jane、MC張天賦同洪嘉豪呢晚擔任音樂祭嘉賓，佢哋各自唱出自己作品，台下觀眾氣氛高漲，抱病演出嘅MC就話自己騷前有頭痛、喉嚨痛同頭暈，因為擔心自己中招嘅關係，所以騷前都做咗兩次快測，確保係一條線先上台演出。

最新有位男學生翻唱《記憶棉》時唱到跪晒地，片段仲喺網上瘋傳，MC就話自己睇到條片嗰陣好佩服對方，因為可以毫無顧忌咁投放晒自己啲感情出嚟，但就擔心網上嘅評論會嚇怕咗位男同學，令佢唔敢再唱歌，所以佢之前特登post咗個story嚟鼓勵對方呀。


嚟緊11月中會開個人演唱會嘅嘉豪，被問到唱片公司斥資二百幾萬幫旗下歌手賣廣告，但就唯獨冇自己份一事，嘉豪呢晚親自回應，話因為呢個project係畀一啲比較新生代音樂風格同年輕一代歌手去參予，而自己已經唔係呢個年紀，所以絕對白明，嘉豪仲笑言希望公司可以補返一個畀佢哋30歲打後嘅老年組歌手呀！

呢晚獻唱新歌嘅Dear Jane，就話估唔到大家反應咁熱烈，佢哋又預告嚟緊戶外騷準備咗好多驚喜畀樂迷，場地入面仲會設有啲戶外先可以玩嘅遊戲，問到佢哋屆時會唔會定服裝主題？Dear Jane就話唔想限定服裝主題，但直言如果大家着得特別啲，佢哋見到都會同大家say個hi呀！