天才少年歌手車禍亡 BSB Nick胞弟暴斃浴室

16歲已經出道；被日本藝能界譽為天才歌手嘅YOSHI，5號深夜喺川崎市駕駛電單車，同一部涉嫌違例右轉嘅貨車相撞，頭部嚴重受傷，惜緊急送院後不治，終年僅19歲。

YOSHI原名佐佐木嘉純，早喺13歲已被發掘以模特兒身身份出道，16歲正式成為歌手，前途無可限量，佢早前參與X JAPAN團長YOSHIKI主理嘅選秀節目，月初仲宣佈成為團隊主音。YOSHI曾同女星紗榮子普出年齡相隔16年嘅忘年戀，仲有傳當時紗榮子要求YOSHI經理人公司公開兩人關係。

另外，日前先宣佈慶祝成團30周年嘅組合Back Street Boy嘅成員Nick Carter嘅胞弟Aaron Carter，5號被發現陳屍寓所浴室，終年34歲，當地警方正調查死因。

Aaron非常年輕時已展露音樂天份，未夠10歲就曾為哥哥嘅爆紅組合BSB擔任暖場嘉賓，同時推出個人大碟銷量過百萬張，又曾為另一火紅之星「小甜甜」Britney Spears嘅個唱暖場。

雖然曾有不俗成績，不過Aaron近年就麻煩多多，先後因為濫藥鬧出新聞，又曾因為情緒問題同兄姊關係決裂，仲因為威脅殺死Nick嘅太太而被申請禁制令。