45日環遊日本丨張寶兒打頭陣住京都超貴價五星酒店試玩通天閣耗資3億日圓超長滑梯

TVB全新旅遊節目《45日環遊日本》將於今晚（24日）起逢周四及周五晚十點半翡翠台播映，由張寶兒、姜麗文及蔣家旻輪流擔任主持，跟住「旅遊達人」項明生，由北海道南下玩至鹿兒島，於45日內走訪25個縣及近百個名勝景點，為觀眾提供熱門旅遊資訊，奉上冷門小知識，讓大家對疫後日本有更全面了解。

張寶兒親身體驗京都千年祭典祇園祭。祇園祭真係好多人，但氣氛好好。
打頭陣於本周首兩集亮相就係張寶兒，親身體驗京都千年祭典祇園祭、試玩大阪通天閣動用3億日圓（約1861萬港元）建成嘅全新超長滑梯、深入能登半島最北端體驗「揚濱式製鹽法」、住總統套房一晚房價高達逾8萬港元嘅京都五星酒店、以及喺屋形船上大啖夏天限定嘅鱧套餐等。

走訪花見小路，近距離與藝伎互動。

美食體驗方面同樣相當精彩，張寶兒先後品嚐咗飛驒牛、蜜瓜香檳祭、海膽飯、日本三大蟹、和牛鐵板燒及各個特色打卡美食等，以祇園祭、瀡滑梯、製鹽體驗及雲海探索最具特色。

成個製鹽過程好考腰力。寶兒覺得係好好嘅體驗。
寶兒與項明生穿日本傳統和服參與祇園祭，擠身喺14萬人次嘅人潮中，近距離見識代表京都各個地區特色「山鉾」。

寶兒親身試玩大阪通天閣動用3億日圓建成的全新超長滑梯。
問到寶兒首次見識載著神明嘅花車喺眼前經過係唔係難忘，寶兒表示：「祇園祭真係好多人，喺起點嗰度已經塞住咗冇辦法再前進，第一次喺日本感受到人貼人嘅感覺，非常逼。」談到防疫工作，寶兒笑言做到足：「喺室外唔會除口罩，同埋會戴住空氣清新機，可能呢個祭真係有啲效，因為好多年前係為咗驅除病魔先有呢個祭出現！」

寶兒最搞笑係佢玩嘅時候一味嗌好熱。
寶兒又指拍攝雲海當日行程緊湊：「前一晚拍到夜晚9點，我12點左右瞓，之後2點起身化妝做準備。因為睇雲海嗰度好多人，要趕搭頭班車霸位先至拍到靚啲嘅畫面。我哋睇到好靚日出，成個天好似畀火燒咁。」寶兒續指唔覺得辛苦，收穫靚景已值回票價。

在屋形船上大啖夏天限定的鱧套餐，靚景配美食，爽呀！
提到工作人員爆料指佢行程期間遺失證件及銀包，寶兒笑言：「平時好少咁大懵，當時啲團友仲擔心過我，買埋雪糕畀我食定驚，好彩最後原來冇唔見到。」

呢個係世界文化遺產白川鄉嘅人氣打卡小食，叫做Churros。總統套房一晚房價高達逾8萬港元嘅京都五星酒店。房間裝潢摩登又古雅，仲要對正地標八坂之塔嘅景觀。
講到被指雪糕控，寶兒今次真係食咗好多唔同味嘅雪糕，佢最記得係有次食咗隻Salted Caramel，上面啲鹽係藍色嘅，配合番流冰館嘅主題，寶兒大讚好好食，另外佢仲試咗納豆味雪糕，第一次食覺得冇味，後來佢再去隔籬檔買多一個試，感覺個味好香！