王丹妮擔任黎明個唱嘉賓 心情緊張親揭選曲原因

天王黎明今個月17、18號一連兩日喺中環海濱活動空間舉行演唱會，請來新歌《一生幸福》MV女主角王丹妮擔任表演嘉賓，喺台上行時裝騷兼獻唱兩首歌。

王丹妮呢日進行排練時，見佢練習《Born This Way》、《螢火蟲》兩首歌，佢透露喺台上行時裝騷，又會獻唱呢兩首歌，所以最近密集式練習，王丹妮希望歌曲切合黎明演唱會主題，更分享《Born This Way》選曲原因，就係想講一種無限嘅美，無論係對自己，或者身邊嘅人，各種朋友應該要表現嗰種愛同關懷。

而王丹妮揀王菲嘅《螢火蟲》係想講當日一眾model好似螢光蟲一樣閃閃發亮，將自己最好嘅狀態呈現畀大家，王丹妮因拍過黎明MV而結緣，今次獲邀擔任嘉賓，佢都好興奮，雖然王丹妮之前拍電影《梅艷芳》有學過唱歌跳舞，不過今次佢以自己聲線唱歌，佢感到有壓力，而且心情好緊張，所以喺澳洲讀脊醫嘅羅孝勇，好快同屋企人返港支持愛妻王丹妮，兼一齊過聖誕同新年，王丹妮覺得有家人支持係最大嘅能量，希望做好今次表演。