衛蘭認不計較獎項 許廷鏗苦練舞步冇周身骨痛：我多肉包住

許廷鏗、衛蘭、林奕匡、鍾舒漫、鍾舒祺、C AllStar成員梁釗峰（釗峰）及何建曦（Jase）呢日現身一個音樂會，衛蘭與新班底合作音樂，跟一啲新人合作覺得幾好玩、有啲新火花，衛蘭坦言現時不太重視獎項：「可能過往好感恩，得到好多機會攞獎，呢樣唔需要太過計較。」

許廷鏗將在12月30及31號於九龍灣國際展貿中心舉行演唱會，佢喜見年底音樂會興旺盛況，自己會欣賞不同音樂會順便取經，佢近日為新歌苦練舞步，仲搵咗一位新生代排舞老師合作，期望新歌玩突破展現舞姿，大讚排舞老師教得好，令佢喜歡上跳舞，希望大家拭目以待留意佢個騷，許廷鏗笑言：「冇練到周身骨痛，因為比較多肉包住，近排多啲拉筋，右邊patpat有啲拉住，不過呢啲係練舞過程，必先勞其筋骨，就可以喺舞台上有一個30幾歲嘅骨格出現。」

C AllStar聖誕舉行戶外音樂會，釗峰同Jase亦無懼戶外寒冷，期待開騷與觀眾互動，釗峰認為唔需要暖包：「如果啲觀眾夠hot，譬如慢歌開燈仔、揈吓，坐喺度會覺得凍。」Jase笑指戶外騷唔使怕觀眾冇反應。